Жиззах давлат политехника институти қошидаги академик лицей ҳамда Жиззах педагогика коллежи махсус гуруҳ ўқувчилари билан олий ҳарбий таълим муассасалари, ҳарбий қисм ва муассасалар, дала-ўқув майдонларига экскурсиялар уюштирилди. Бу ҳақда Мудофаа вазирлиги матбуот хизмати хабар бермоқда.
Махсус гуруҳ ўқувчилари дастлаб Жиззах олий ҳарбий авиация билим юртида меҳмон бўлди. Олий ҳарбий таълим муассасасида ўқувчилар ўқув жараёни ва курсантлар учун яратилган шарт-шароитлар билан танишди. Вертолёт ва самолётларнинг тактик-техник хусусиятларини ўрганиш баробарида отиш тайёргарлиги, ҳарбий топография, умумий тактика, оммавий қирғин қуролларидан ҳимояланиш машғулотларидан назарий ва амалий кўникмаларини бойитди.
Олий ҳарбий таълим муассасасидан сўнг ўқувчилар Жиззах вилоятининг Пахтакор туманида жойлашган ҳарбий учувчиларнинг ўқув марказида бўлиб, таълим жараёни, амалий машғулотлар билан яқиндан танишди.
«Махсус гуруҳ ўқувчилари Ватан ҳимоячиларининг ҳаёти, фаолияти, жанговар ва маънавий-маърифий машғулотларини нафақат кузатди, балки бевосита иштирокчига ҳам айланди. Дала-ўқув майдонидаги йигитлар ҳарбий хизматчилардек тановул қилди», — дейилади хабарда.
Изоҳ (0)