«ВКонтакте» ва Telegram мессенжерининг асосчиси Павел Дуров Дубайга кўчиб ўтишга қарор қилди. Бу ҳақда у Bloomberg билан бўлиб ўтган интервьюда маълум қилди, деб хабар берди «Ведомости».
«Менга у ер ёқади. Шаҳар стартап тезлигида ривожланмоқда», — дейди Дуров БААнинг йирик шаҳарларидан бири ҳақида. Унинг сўзларига кўра, Дубайни танлашидан мақсад, шаҳарда эркин иқтисодий зонанинг мавжудлиги.
«Бу принцип масаласи. Ғарбдаги кўпчилик солиқлар имкониятларни қанчалик чеклашини тушуниб етмайди. Сиз солиқлар учун даромаднинг салкам ярмини тўлашингиз мумкин, бу эса йилнинг 180 куни давлат учун ишлашингизни англатади. Ўйлашимча, жамият манфаати учун топаётган пулларимни сарфлашга яхшироқ ечим топа оламан», — деди Дуров.
Агентликнинг маълумотларига кўра, Дуровнинг янги офиси Dubai Меdiа City осмонўпар биносининг 23-қаватида жойлашган.
2013 йилда Дуров Кариб оролларининг Сент-Китс ва Несив давлати фуқаролигини олган. У ҳеч қачон бу давлатда бўлмаган ва фуқароликни Европадан туриб олган, бу орқали у Европа Иттифоқи ва Буюк Британияга визасиз ташриф буюришни мақсад қилган.
Дуров Россияни 2014 йилда, «ВКонтакте» бош директорлигидан кетгач ва UCP жамғармаси билан юзага келган можаро сабаб ижтимоий тармоқнинг ўзига тегишли бўлган 12 фоиз акциясини сотиб тарк этган. Ўша вақтда у «ВКонтакте» асосчиси бўла туриб, ўзининг шахсий Telegram лойиҳасини ривожлантираётганликда айбланган.