Жорий йилда 724 минг тонна ҳўл мева четга сотилди ва 856 миллион доллар валюта кирими амалга ошди

Бугун, 9 декабрь куни «Ўзбекистон» халқаро анжуманлар саройида Ўзбекистон Республикаси қишлоқ хўжалиги ходимлари кунига бағишланган байрам тадбирида Ўзбекистон Президенти Шавкат Мирзиёев иштирок етиб, соҳа ходимларини табриклади, бу борада эришилган ютуқлар ҳақида фикр билдирди. Бу ҳақда президент матбуот хизмати хабар бермоқда.

Олиб борилган иқтисодий ислоҳотлар, фермерлик ҳаракатининг ривожланиши натижасида, жорий йилда мамлакат бўйича жами бўлиб 8 миллион 377 минг тонна ғалла етиштирилди. 2 миллион 930 тоннадан зиёд пахта ҳосили, 12 минг 450 тонна пилла, 318 минг тонна шоли, 23 миллион тонна мева-сабзавот, 13 миллион тонна гўшт ва сут маҳсулотлари олишга эришилди.

Жорий йилда биринчи марта, ғалладан бўшаган қарийб 1 миллион гектар майдонга сабзавот, картошка, полиз ва дуккакли экинлар экилди ва 5,5 миллион тоннадан ортиқ маҳсулот етиштирилди.

Қишлоқ хўжалиги маҳсулотларининг 132 минг тоннаси қайта ишланиб, 100 миллион долларлик тайёр маҳсулот экспорт қилинди. 724 минг тонна ҳўл мева четга сотилди ва 856 миллион доллар валюта тушди.

Ўзбекистонда қимматбаҳо хом ашё бўлган ипак етиштиришнинг мутлақо янги тизими йўлга қўйилиб, бу йил биринчи марта пилладан йилига икки марта ҳосил олиш тажрибаси синовдан ўтказилди ва ижобий натижа берди.

Ҳозирги кунда мамлакатда 15 та йилқичиликда насл хўжаликлари фаолият кўрсатмоқда. Уларда 3 минг 150 дан зиёд зотдор от боқилади.

Охирги 20 йилда эътибордан четда қолган балиқчилик соҳасини тиклаш учун «Ўзбекбалиқсаноат» уюшмаси ташкил этилиб, унинг тизимига 3 минг 600 та балиқчилик хўжалиги киритилди. 580 минг гектар табиий ва 28 минг гектар сунъий кўлларда 100 минг тоннадан ортиқ балиқ етиштирилди.

Пахтачилик бўйича ўз тажриба мактабини яратаётган фермерлар сонининг кўпайиб бориши натижасида жорий йилда гектаридан ўртача 50 центнердан ортиқ ҳосил олган фермерлар 1 минг 121 тани, 45 центнерлик маррани эгаллаган фермерлар 2 минг 130 тани, 40 центнерчилар 7 минг 208 тани ташкил этди.

Сув ресурслари чекланган минтақада деҳқончилик қилиш, мўл ва сифатли ҳосил олиш мақсадида сувни тежайдиган технологияларни жорий этишга алоҳида эътибор берилиб, бугунги кунда қарийб 240 минг гектар майдонда ана шундай технологиялар, жумладан, 28 минг гектар ерда томчилатиб суғориш технологияси жорий қилинди.

«2018 йилда мамлакатимизда етиштирилаётган 1 миллион 200 минг тонна пахта толасини юртимизда тўлиқ қайта ишлаб, хорижга фақат тайёр маҳсулотлар экспорт қилишни йўлга қўйишимиз зарур», — дея таъкидлади Шавкат Мирзиёев.