Ўзбекистон Кубогининг финалида «Локомотив»дан енгилган «Бунёдкор» ўз тарихида илк бор Осиё Чемпионлар Лигаси турниридан четда қолди.
2008 йилдан буён қитъанинг энг нуфузли клублари турнирида иштирок этиб келаётган «Бунёдкор», 10 йиллик анъанасига чек қўйди. ОФК Ўзбекистон клублари учун 1+2 квотасини тақдим этган бўлиб, мамлакат чемпиони сифатида «Локомотив» гуруҳ босқичига йўлланма берувчи ягона чиптани ютиб олганди.
«Темирйўлчилар» бу билан чекланмай, «Бунёдкор» ютиши мумкин бўлган чиптани «Пахтакор»га олиб берди. Бу йўлда жамоа Ўзбекистон Кубогининг финалида зафар қучди. Шу тариқа, саралаш ўйинларига йўлланма берувчи 2 та чипта чемпионатни «Локомотив»дан кейинги ўринларда якунлаган «Насаф» ва «Пахтакор»га насиб қилди.
«Пахтакор» Чемпионлар Лигасида ўйнайди. «Бунёдкор» Ўзбекистон Кубоги финалида «Локомотив»дан енгилди
Мавсум аввалида «Бунёдкор»да бош мураббий бўлиб Сергей Лушчан ишлаётганди. Мутахассис 8-турдан кейин истеъфога чиқарилди. Боиси, унинг бошқарувида «қалдирғочлар» 8 та беллашувнинг бор-йўғи 2 тасида зафар қучди. Яна шунча ўйинда имконият бой берилган бўлса, 4 тасида ғолибни аниқлаб бўлмади. Мазкур натижалар сабаб «Бунёдкор» пешқадамлардан ортда қола бошлади.
«Бунёдкор» антирекордларини бирма-бир якунлаган Лушчандан кейин жамоани Миржалол Қосимов қабул қилиб олди. Мавсум аввалида Лушчан тўплаш мумкин бўлган максимал очколарнинг 33 фоизига эга чиққан бўлса, Қосимовда бу кўрсаткич 64 фоизни ташкил қилди. Бироқ шунда ҳам «Бунёдкор» 4-ўриндан юқорига кўтарила олмади.
Изоҳ (0)