Келаси йилнинг 18 август санасида Осиё Олимпиадаси старт олади. 18-бор ўтказиладиган ва расман Осиё Ўйинлари деб юритиладиган фестивалнинг 2018 йилдагисига Индонезиянинг бирйўла икки шаҳри — Жакарта ҳамда Палембанг мезбонлик қилади.
40 та спорт тури бўйича ўтадиган Осиё Ўйинлари—2018 2 сентябрга қадар давом этади. Унда Осиё мамлакатлари умумжамоа ҳисобида етакчи бўлиш йўлида кураш олиб боради. Жумладан, Ўзбекистон делегацияси ҳам Осиё Ўйинларига фаворит термалар қаторида етиб келади.
Осий Ўйинлари—2018 Токио мезбонлик қиладиган 2020 йилги Олимпиада беллашувлари олдидан тайёргарлик вазифасини ўтаб бериши билан аҳамиятлидир. Ўзбекистон Миллий Олимпия Қўмитаси Рио—2016 Олимпиадасидаги муваффақиятли иштирокдан кейиноқ Токио—2020 учун ҳаракатни бошлаб юборган бўлиб, ўтган вақт ичида икки йирик комплекс мусобақада иштирок этди ва етакчилар қаторидан жой олди.Ислом Бирдамлиги Ўйинлари—2017
Шу йилнинг 12—22 май кунлари Ўзбекистон делегацияси Боку мезбонлигида ўтган Ислом Бирдамлиги Ўйинларида ўз тарихида илк бор иштирок этди. Бунгача мазкур фестиваль 2005 йил Саудия Арабистонида, 2010 йил Эронда ва 2013 йил Индонезияда бўлиб ўтганди.
Ўзбекистонлик спортчилар айнан Озарбайжондаги турнирда дебют қилди ва у чакки чиқмади. Аҳолисининг катта қисми ислом динига эътиқод қилувчи 54 та мамлакат делегацияси Бокуга етиб келганди. Ўзбекистон умумжамоа ҳисобида Озарбайжон, Туркия ва Эрондан кейин 4-ўринни эгаллади. Мамлакат спортчилари жами 63 та медални қўлга киритди: 15 та олтин, 17 та кумуш ва 31 та бронза. Бу Ўзбекистон делегациясининг Марказий Осиёдаги мавқесини кўрсатиб берди.
Усти ёпиқ иншоотлардаги Осиё Ўйинлари—2017
2017 йил МОҚ ўз спорчилари билан иккинчи йирик мусобақага — Туркманистон пойтахти Ашхобод мезбонлик қилган усти ёпиқ иншоотлардаги Осиё Ўйинларига ташриф буюрди. Қитъа мамлакатлари ўртасидаги мазкур мусобақада Ўзбекистон делегацияси терма жамоага номзод спортчиларни синовдан ўтказиб олди. Асосий мақсад Токио—2020 Олимпиадасида муносиб иштирок этиш бўлгани учун ҳам, унгача бўлган комплекс мусобақалар номзод спортчиларга имконият беришда ас қотади.
Шунда ҳам Ўзбекистон термаси 62 мамлакат орасида 5-ўринни эгаллади. Бунда медаллар сони юздан ошиб кетди: 24 та олтин, 33 та кумуш ва 74 та бронза. Жанубий Корея ва Япония каби етакчи мамлакатлар натижаси ҳам кўрсатиб турибдики, улар ҳам Ашхободга термага номзод спортчиларни синовдан ўтказишга ташриф буюрганди.
Осиё Ўйинлари—2018
Жакарта ва Палембангда ўтадиган бу мусобақа нуфузи жиҳатдан анча обрўли саналади. Бунда Осиё қитъаси мамлакатлари ўзига хос Олимпиадада куч синашиб кўради. Эндиликда Токио—2020 учун тайёргарлик асосий босқичга чиқади.
26—29 ноябрь кунлари Индонезия мазкур фестивалнинг иштирокчи мамлакат журналистлари ўртасида катта Медиа Форум ташкил қилди. Унда Миллий Олимпия Қўмиталари матбуот котиблари ҳамда ҳар бир мамлакатнинг етакчи нашрлари ўз журналисти билан иштирок этди. Яъни, Осиё Ўйинларига кириш қисмини журналистлар бошлаб берди.
Ўзбекистон Миллий Олимпия Қўмитаси матбуот котиби Зафар Имомхўжаев ҳамда «Дарё» интернет нашри спорт бўлими вакили Медиа Форумда иштирок этди. Унда Осиё Ўйинларига тайёргарлик, спорт комплексларидаги аҳвол, ташкилотчилик, спортчилар истиқомат қиладиган олимпия шаҳарчалари ва бошқа мавзулар асосий планга олиб чиқилди. Бунгача Индонезиянинг Осиё Ўйинларига тайёр эмаслиги айтилгани, кейинроқ туркманистонликлар вазият тақазо этса, уни қабул қилишга тайёрликлари ҳақида гап-сўзлар чиққанидан кейин, Индонезия журналистлар олдида ҳисобот беришга қарор қилди.
150 га яқин спорт журналистлари иштирок этган Медиа Форумда бир қатор масалаларга ойдинлик киритилди. Улардаги мавзулар «Дарё»нинг Токио—2020 учун очилган алоҳида саҳифасида ёритиб борилади.
Ўзбекистон делегациясининг Рио—2016 да қайд этган натижаси тарихий бўлди. 4 та олтин, 2 та кумуш ва 7 та бронза медали билан умумжамоа ҳисобида 21-ўринни эгаллаган ўзбекистонликлар, Марказий Осиёда биринчи бўлди. Бутун Осиё қитъаси мамлакатлари таснифида олганда, Ўзбекистон термаси Хитой, Япония ва Жанубий Кореядан кейин тўртинчи эди. МДҲнинг 15 мамлакати орасида эса ўзбекистонлик спортчилар фақатгина Россиядан ортда қолди ва иккинчи бўлишни уддалай олди.
Айни вақтда МОҚ Токио—2020 да ҳам энг камида шу натижани такрорлаш йўлида иш олиб бормоқда. Янги йилдан бошлаб мамлакат спортчилари Осиё Ўйинлари—2018 учун тайёргарлик бошлайди. Олдинда делегацияни яна бир жиддий синов кутиб турибди.
Изоҳ (0)