Ҳинд океанидаги Мадагаскар оролида ўлатдан вафот этганлар сони 200 дан ошиб кетди, деб хабар беради «Интерфакс».
Жаҳон соғлиқни сақлаш ташкилоти 27 ноябрь, душанба куни Мадагаскарда ўлат оқибатида 1 августдан 22 ноябрга қадар 202 киши вафот этгани, бу эса сўнгги 50 йил ичидаги энг йирик кўрсаткич эканлигини маълум қилди.
Бундан ташқари, 2,34 мингдан зиёд киши ўлатни юқтириб олган.
Ўлат Мадагаскардаги эндемик касаллик ҳисобланади. Бу ерда ҳар йили ўлатга чалинишнинг 400 га яқин ҳолати қайд этилади.
Касалликнинг кенг тарқалиши ўтган йили, 2016 йилнинг декабрь ойида оролдаги чекка туманлардан бирида кузатилган эди. Бироқ ҳозирда Антананариву ва Туамасин каби йирик шаҳарлар аҳолиси ҳам ўлат билан оғримоқда.
Бундан ташқари, ўлатнинг тез юқадиган ва 24 соат ичида ўлимга олиб келадиган тури ҳам кенг тарқалмоқда.
Изоҳ (0)