Тошкент шаҳар божхона бошқармаси контрабандага қарши курашиш бўлими ходимлари томонидан Хитойдан юк қабул қилувчи, якка тартибдаги тадбиркор Б.Исаев (мақоладаги барча исм-шарифлар ўзгартирилган) номига келган иккита контейнер унинг ишончли вакили иштирокида очилиб текширилди, деб хабар беради Давлат божхона қўмитаси ахборот хизмати.
Текшириш жараёнида мазкур контейнерларга йўл-юк ҳужжатларида қайд этилган умумий қиймати 12 720 АҚШ долларини ташкил этувчи, вазни 53 тоннадан ортиқ МДФ ёғоч толали плитаси ва темир сим маҳсулотлари ўрнига юк кузатув ҳужжатларида қайд этилмаган вазни 52 тоннадан зиёд профнастил учун мўлжалланган саморез маҳсулотлари юкланганлиги маълум бўлди.
Далилий ашё сифатида вақтинча олиб қўйилган товар моддий бойликларнинг умумий қиймати дастлабки ҳисоб-китобларга кўра 1 миллиард 93 миллион сўмдан ортиқни ташкил этди.
Агарда тақдим этилган ҳужжатларга асосан маҳсулотлар расмийлаштирилганда тўрт миллион сўм божхона тўловлари ундирилиши мумкин эди. Аммо божхона кўриги натижасида аниқланган маҳсулотлар расмийлаштирилганда эса 1 миллиард 31 миллион сўм божхона тўловлари ундирилиши аниқланди.
«Қонунбузар ўзи олиб кираётган товарни ҳужжатларда бошқа ном билан кўрсатиш йўли билан бир миллиард сўмдан ортиқ маблағни давлат бюджетига тўлашдан қочишга уринганлиги фош бўлди», — дейилади хабарда.
Ҳозирда юқоридаги ҳолатлар юзасидан божхона текширувлари ва суриштирув ҳаракатлари давом эттирилмоқда.
Изоҳ (0)