Фарғона вилояти божхона бошқармаси ходимлари томонидан «Водил—Фарғона» йўналишида ҳаракатланаётган Dongfeng русумли юк автомашинаси чегара назорат ҳудудларида келиб кетиши шубҳали кўринганлиги боис назоратга олинди, деб хабар беради Давлат божхона қўмитаси ахборот хизмати.
Фуқаро М.Эргашев бошқарувида бўлган юк автомашинаси Фарғона шаҳар Ёрмозор МФЙ ҳудудидаги жойлашган рақамсиз хонадон ичига кирган вақтида тўхтатилиб, кўздан кечирилди.
Натижада автомашина борт қисмининг тагида ташқи томондан кўринмайдиган қилиб яширин равишда, божхона назоратини четлаб айланма йўллар орқали олиб кирилган, умумий қиймати 30 миллион сўмлик жами 15 000 дона Orbit номли сақичлар борлиги аниқланди.
Шунингдек, ушбу автомашина кирган хонадон кўздан кечирилганида яшаш хоналарида сақланаётган Қирғизистон Республикасидан божхона назоратини четлаб, айланма йўллар орқали олиб кирилган, ҳужжатлари бўлмаган умумий қиймати 50 миллион сўмлик 78 дона эркаклар жинси шими, 210 дона Nestle номли шоколадлар, 22840 дона Orbit номли сақичлар борлиги аниқланди.
Шу билан бирга олиб борилган тезкор тадбир давомида автомашина эгаси М.Эргашевнинг Фарғона туманидаги яшаш хонадони холислар иштирокида кўздан кечирилди, хонадонга киришда дарвозахонаси ёнида муқаддам Қирғизистон Республикасидан божхона назоратини четлаб, айланма йўллар орқали олиб кирилган, қиймати 6 миллион сўмлик 3000 дона Orbit номли сақичлар сақланаётгани аниқланди.
Ўтказилган тадбир давомида умумий қиймати 86 миллион 630 минг сўмлик товар моддий бойликлари ашёвий далил тариқасида олинди.
Худди шундай қонунбузарлик ҳолати фуқаро А.Мамасидиқов томонидан ҳам содир этилди. Унинг бошқарувидаги Lacetti русумли автомашинасида ёқилғи қуйиш баки ичига умумий қиймати 108 миллион 650 минг сўмлик жами 98 дона Xiaomi Redmi 4Х маркали уяли телефон аппаратлари ҳамда автомашина заҳира балонида 1700 дона қошиқ маҳсулоти яширилгани аниқланди.
Изоҳ (0)