Берлусконининг собиқ рафиқасига алимент сифатида тўланган 60 миллион еврони қайтариш мажбурияти қўйилди

Италия собиқ бош вазири Сильвио Берлусконининг собиқ рафиқаси ва уч нафар фарзандининг онаси Вероника Ларио суд қарорига биноан Берлусконидан алимент сифатида олган 60 миллион еврони қайтарадиган бўлди, деб хабар берди Meduza.

Шунингдек, суд Берлусконидан собиқ рафиқасига ҳар ойда тўланадиган 1,4 миллион евро алимент мажбуриятини ҳам олиб ташлади.

Берлускони адвокатларининг таъкидлашича, Вероника Ларио собиқ турмуш ўртоғининг пулларига муҳтож эмас, чунки ўзининг 16 миллион евро бойлиги мавжуд — ушбу пуллар банкларда, қимматбаҳо буюмлар ва кўчмас мулк соҳасидаги бизнесида айланади.

Сильвио Берлускони ва Вероника Ларио 1990 йилда турмуш қурган. 2009 йилда Вероника турмуш ўртоғини хиёнатда айблаб ажрашиш даъвосини берган. 2012 йилда суд Берлускони собиқ хотинига ҳар ойда 3 миллион евро тўлаши бўйича қарор чиқарган. Кейинги йилда эса ушбу маблағ 1,4 миллион еврога туширилган эди.