Умрбод озодликдан маҳрум этилган америкалик ашаддий қотил Чарльз Мэнсон қамоқхонадан Калифорниядаги касалхонага олиб кетилди, деб хабар беради New York Post.
Хабарда қайд этилишича, 83 ёшли жиноятчининг аҳволи ўта оғир деб баҳоланган. Айни вақтда у ҳаёт учун курашмоқда. Клиникада у билан бирга беш нафар полициячи ҳам бор.
Мэнсоннинг айни қайси касалликка чалингани маълум қилинмаган. Бироқ, шифокорлар унинг яқин вақт ичида вафот этишини айтган.
2017 йилнинг январь ойида Мэнсон ошқозонидаги муаммолар туфайли касалхонага тушган эди. Орадан бироз вақт ўтгач, у яна қамоқхонага қайтарилганди.
Мэнсон 1969 йилда ўзининг «Оила» деб номланган жиноий гуруҳи билан бирга режиссёр Роман Поланскининг рафиқаси Шэрон Тейт ва унинг тўрт нафар дўстини ўлдирган. Бундан ташқари, Мэнсон яна иккита қотилликда айбдор деб топилган.
Айрим маълумотларга кўра, у содир этган қотилликларнинг сони бундан ҳам кўпроқ.
Мэнсон ва унинг уч шеригига ўлим жазоси берилган, бироқ 1972 йилда Калифорнияда ўлим жазоси бекор қилингани учун улар умрбод озодликдан маҳрум этилган.
Изоҳ (0)