Америкалик маркетолог Жули Бриксменни қўллаб-қувватлаш учун 70 минг доллар йиғилди. У АҚШ президенти Дональд Трампнинг кортежига қарата ножоиз қилиқ қилгани учун ишдан бўшатилган эди. Бу ҳақда TJournal хабар берди.
«Раҳмат сенга, Жули Бриксмен» шиори остида бўлиб ўтаётган пул йиғиш жараёни Go Fund Me сайтида Роб Мелло томонидан эълон қилинган. Унинг сўзларига кўра, аёлнинг ишдан бўшатилиши унинг Конституцияда кўрсатилган ҳуқуқларини бузиш ҳисобланади. Мелло Бриксмен билан боғланган ва аёл бу ташаббусни маъқуллаган.
Етти кун ичида уч мингдан ортиқ киши пул йиғишда ўз ҳиссасини қўшган. Асосий мақсад — 100 минг доллар йиғиш. Хайрияни исмни кўрсатиб ёки аноним ҳолда қилиш мумкин.
Ёши 50 да бўлган аёлнинг икки нафар фарзанди бор. У Виржиния штатининг Стерлинг шаҳрида яшайди. Аёлнинг уйи яқинида Трампнинг Миллий гольф клуби жойлашган. Президент клубдан қайтаётганда, аёл худди шу йўналишда велосипедда кетаётган эди. Кортежга етиб олган Бриксмен ўрта бармоғини кўрсатган ва бошқа томонга бурилиб кетган. Фотосуратни президент фаолиятини ёритувчи матбуот гуруҳи журналисти олган.
Изоҳ (0)