Кремлда Владимир Путин 2018 йил мартидаги президент сайловларида қатнашиши ҳақида қачон ва қай тарзда эълон қилишини муҳокама қилишмоқда, деб ёзади «РБК».
Россия президенти ўз нияти ҳақида оммага эълон қилмаган бўлса-да, сайловда қатнашишга қарор қилган. Бу ҳақда нашрга федерал мансабдор маълум қилди. Бугунги кунда Путиннинг номзодини илгари суришнинг бир нечта сценарийлари бор.
У ўз қарори ҳақида Федерация Кенгаши сайлов кунини эълон қилишигача ёки ундан кейин маълум қилади. Сайловлар 2018 йилнинг 18 мартида бўлиб ўтади. Сайлов кампаниясини 7—17 декабрь даврида белгилашади.
Базавий концепция шундан иборатки, Путин сайловлар расман белгиланганидан кейин, «Ягона Россия»нинг 22—23 декабрдаги қурултойигача эълон қилиши мумкин. Шунингдек, Путин ўз номзодини қўйиши ҳақида январнинг бошида эълон қилади, деган вариант ҳам бор.
Бундан ташқари, нашр манбаси айтишича, Путин ўз нияти ҳақида бирорта ҳудудга сафари чоғида (ишчилардан бири шундай савол берган пайтда) эълон қилиши ёки таниқли кишилар иштирокида махсус йирик тадбирни ташкил қилиб, ўша ерда эълон қилиши мумкин.
Изоҳ (0)