Наманганда фирибгарлик билан боғлиқ қатор жиноят ишлари қўзғатилди

Наманганда фирибгарлик билан боғлиқ қатор жиноятлар фош этилди. Бу ҳақда «Дарё»га Наманган вилоят ИИБ матбуот хизмати маълум қилди.

26 октябрь куни Наманган шаҳрида яшовчи, 1991 йилда туғилган К. Нўъмон ички ишлар идораларига мурожаат қилди. 2016 йил декабрь ойида таниши, Янгиқўрғон туманида яшовчи, 1982 йилда туғилган О. Баҳодир «Микрокредитбанк» балансида бўлган ер майдонини сотиб олиб беришини айтиб, 15 миллион сўмини олгани, бироқ ўз эҳтиёжи учун сарфлаб юборганлигини маълум қилди.

Шу куни Наманган шаҳрида яшовчи, 1964 йилда туғилган Н. Мадина ҳам ариза билан мурожаат қилиб, жорий йил август ойида таниши, Наманган шаҳрида яшовчи, 1966 йилда туғилган С. Омина фарзандини тиббиёт коллежига ўқишга киритиб қўйишлигини айтиб, 800 долларини олиб, ўзлаштириб юборганлигини билдирди.

2017 йил 6 ноябрь куни Учқўрғон туманида яшовчи, 1962 йилда туғилган Ш. Ҳошим 2013 йил сентябрь ойида таниши, Наманган шаҳрида яшовчи, 1984 йилда туғилган Б. Аҳрор ишончига кириб, саккизта юк машинасида келаётган озиқ-овқат маҳсулотларига пул етмаётганлигини айтиб, 84 миллион сўмини олгани ва ҳозиргача бермай келаётганлигидан шикоят қилди.

7 ноябрь куни Тўрақўрғон туманида яшовчи, 1989 йилда туғилган В. Козим 2016 йил декабрь ойида таниши, Наманган шаҳрида яшовчи, 1994 йилда туғилган П. Расул «Жанубий Кореядаги олий ўқув юртларига ўқишга киритаман» деб алдаб, 4500 долларини олиб, шахсий манфаатлари йўлида ишлатиб юборганлигини маълум қилди.

Ушбу ҳолатлар бўйича Наманган шаҳар ИИБ тергов бўлими томонидан ЖКнинг 168-моддаси 1-қисми билан жиноят ишлари қўзғатилиб, гумонланувчилар тилхат орқали очиқда қолдирилди.