10 ноябрь куни миллий матбуот марказида Ўзбекистон Республикаси Миллий хавфсизлик хизмати томонидан «Ноқонуний миграция ва одам савдосига қарши курашиш мавзусида брифинг ташкил этилди.
Миллий хавфсизлик хизмати матбуот маркази ходими Лола Йўлчибоеванинг сўзларига кўра, 2016 йилда ва жорий йилнинг биринчи ярмида МХХ органлари томонидан Ўзбекистон фуқароларини ноқонуний меҳнат ва жинсий эксплуатацияга жалб этиш мақсадида чет элга чиқариш билан шуғулланган 216 нафар шахснинг фаолиятига чек қўйилди.
МХХнинг Хоразм вилояти бошқармаси томонидан вилоятда истиқомат қилаётган қизларни Бирлашган Араб Амирликларига жўнатиш билан шуғулланган йирик уюшган жиноий гуруҳ фаолияти фош этилди ва тугатилди.
Хусусан, БААда мажбурий ишлатиш учун ёш қизларни излаш, ёллаш ва Хоразм вилоятидан олиб чиқиш билан шуғулланган 1992 йилда туғилган И. Аманова қўлга олинди.
Шунингдек, унинг мазкур вилоятдаги шериклари, қурбонларни ёллаш билан шуғулланган 1994 йилда туғилган К.Отажонов ва 1988 йилда туғилган Ш. Ражабовлар ҳам жиноий жавобгарликка тортилди.
Қизларни «Ўзбекистон—Россия—БАА» йўналиши бўйича юбориш билан 1990 йилда туғилган У.Раҳимов шуғулланган бўлса, уларни жўнатиш жараёнида қўриқлаш ва хавфсизликларини таъминлаш вазифаси 1989 йилда туғилган Э.Отамуротовга юклатилган.
Бирлашган Араб Амирликларига етиб келган қизларни эса Дубай шаҳрида бир нечта фоҳишахона юритаётган 1995 йилда Хоразм вилоятида туғилган О.Алламова ва 1983 йилда Қашқадарё вилоятида туғилган А.Шабиевалар кутиб олган.
Тезкор тадбирлар давомида уюшган жиноий гуруҳ аъзолари 1995 ва 1997 йилларда туғилган қизларни Россия орқали Дубай шаҳрига жўнатиш мақсадида Қозоғистон ҳудудига олиб чиқишга уринаётган вақтда қўлга олинган.
Жиноий гуруҳ аъзоларига нисбатан Хоразм вилояти ИИБ томонидан МХХ Бошқармаси материаллари асосида Ўзбекистон Республикаси Жиноят Кодексининг 135-моддаси бўйича жиноят иши қўзғатилган.
Изоҳ (0)