Қирғизистоннинг Жалолобод шаҳрида тўйга ташриф буюрган меҳмонлар милиционерларга ҳужум уюштирди ва уларнинг патруль машинасига зарар етказди. Бу ҳақда Kaktus media хабар бермоқда.
Хабарда қайд этилишича, тўйга ташриф буюрган меҳмонлар ўз қувончини баралла намоён этган. Ҳуқуқ-тартибот органлари ходимлари эса уларни тартибга чақирган. Мазкур хатти-ҳаракатга жавобан 10 киши милиционерларга ташланган.
Ички ишлар ходимлари сархуш оломонни тинчлантириш учун ҳавога ўқ узган, бироқ бу ёрдам бермаган.
Милиционерлар жанжал ташкилотчиларидан бирини олиб кетмоқчи бўлганида унинг тарафдорлари патруль машинасини тепа бошлаган. Шундан сўнг меҳмонлар бошқа патруль машинасини ўраб олган ва унинг юришига изн бермаган.
Натижада 15 нафар безори милиция бўлимига олиб кетилган. Улардан беш нафари икки ойга озодликдан маҳрум этилган. Ҳодиса юзасидан «Безорилик» моддаси бўйича жиноят иши қўзғатилган.
Изоҳ (0)