«KRuz.uz» блогер Дилафруз Айтбаеванинг германиялик сайёҳнинг Қорақалпоғистонга қилган сафари ҳақида ёзганларини келтириб ўтди.
«Инсон ҳамиша янгиликларга, саргузаштларга иштиёқи баланд бўлиши керак. Шундагина у бу дунёдаги барча нарсалардан чексиз завқ ола билади» — бу яқиндагина танишган германиялик дўстим Кристиан Бманнинг ўзига доимий шиор қилиб олган сўзлари эди.
У билан туристлар гавжум бўладиган – Нукуснинг ташриф қоғозига айланган И.Савицкий номидаги Қорақалпоқ санъат музейи ёнида танишиб қолдим. Чет тилида сўзлашишда тажриба «хуржун»имни тўлдириш мақсадида ҳеч иккиланмай нималарнидир муҳокама қилаётган икки сайёҳнинг суҳбатини «бўлдим» (Кристианнинг ёнида англиялик сайёҳ Ханна Спинсер ҳам бор эди). Европанинг марказий давлатларидан бири бўлган Германиядан мотоцикл уловида саёҳат қилиб юрган бу шоввоз билан дарров тил топишиб олдим.
Бу сайёҳнинг Нукусдаги энг биринчи таниши бўлганлигим боис, К. Бманн йўл бўйи дуч келган энг оддий нарсалардан ҳам ҳайратланганини яширмай ўз таассуротларини мен билан бўлишди. «Ўзбекистонга Қозоғистон орқали кириб келдим. Ватанингизда биринчи қўним топган маконим Мўйноқ бўлди. Бу ерда Орол денгизига бориш бироз мураккаброқ масала экан (айниқса, мотоциклда). Лекин «Кемалар қабристони»га бордим. У ер чиндан ҳам одамнинг юрагини эзадиган жой экан. Қумга ботган кемаларга жуда ҳам раҳмим келди...»
28 ёшли германиялик бу ўғлон кузнинг илк кунларида сафарга отланиб, ўн битта давлатнинг бир-бирига ўхшамаган шаҳарлари, одамлари билан танишиб, қорақалпоқ халқига ҳам ўзига хос эътироф билдирди: «Ота-онам санъатнинг шайдоси. Бу ерда дунёга машҳур И.Савицкий номидаги музей борлигини ҳам билишади. Сафарга отланганимда ота-онамнинг санъатга хумор кўзларини ҳам «ўзим билан олиб чиққанман». Ҳайратларимнинг энг каттаси мана шу мўъжаз музейда пайдо бўлди. Очиғи, бундай ҳайратланишни ўзимдан кутмаган эдим. Музейдаги барча санъат асарлари – оз сонли қорақалпоқ халқининг жуда ҳам бой маданиятидан сўз очади. Айниқса, қора уй менга жуда ҳам ёқди. Агар иложи бўлганида мен жон-жон деб Нукусдаги кунларимни ўша уйда яшаб ўтказган бўлардим». Ҳар бир халқнинг тилини, ўзига хос урф-одатини, тарихини ўрганишни – ўзининг асосий мақсади деб санаган Криснинг кейинги манзиллари – юртимизнинг энг кўҳна шаҳарлари – Хива, Бухоро ва Самарқанд.
Ўз саёҳатини йилнинг охиригача давом эттирмоқчи бўлган қаҳрамонимиз уйига Янги йилда бир олам таассуротлар билан боришни ният қилган. Саргузаштга хумор бу дўстимизга сафари бехатар бўлишини тилаймиз!
Изоҳ (0)