«Айтилган пулни бермасанг, видеони тарқатиб, шарманда қиламиз». Сурхондарёда маишатпараст эркакларни «бегона ётоқ»да тутиб олиш билан пул ишлаган товламачилар қўлга олинди

Сурхондарёнинг Жарқўрғон туманида товламачилик билан шуғулланган 18 кишидан иборат жиноий гуруҳ фаолияти фош этилди. Ўзбекистон ИИВ матбуот хизмати хабарига кўра, жиноий гуруҳ фаолияти икки киши томонидан бошқарилган, улар бу ишга вояга етмаган фарзандини ҳам жалб этган.

Товламачилар жиноий гуруҳга аъзо қизлар ёрдамида эркак мижозларни «массаж», «дам олиш», «маишат қилиш» баҳонасида, ўз хоҳиши ёки алдов йўли билан белгиланган хонадонга олиб келган. Мижоз ётоқхонага кириб, ечина бошлаши билан, хонага жиноий гуруҳ аъзолари кириб келган ва ҳодисани уяли телефон воситасида тасвирга тушира бошлаган.

Жиноий гуруҳ аъзолари «қўлга тушган» эркакларни маҳалласида, оиласида, иш жойида шарманда қилиш, видеоёзувни интернетга чиқариб юбориш билан қўрқитиб, улардан катта миқдордаги пулларни товламачилик йўли билан олган.

Хабар беришларича, гуруҳ аъзолари «маҳалла раиси», «посбон», «терговчи», «тасвирчи», «ҳайдовчи» ва бошқа вазифаларни ўзаро тақсимлаб олган ва уларнинг ҳар бири ўз ролини пухта, ишонарли ўйнаган.

ИИВ ахборотида гуруҳ аъзоларининг бундай хатти-ҳаракатлари натижасида неча киши жабрлангани, уларга қанча моддий зарар етказилгани ҳақида батафсил маълумот берилмаган.

Ҳолат юзасидан жиноий иш қўзғатилгани, жиноий гуруҳнинг бошқа жиноятларга алоқадорлиги юзасидан тергов ва суриштирув олиб борилаётгани маълум қилинди.