Ўзбекистон 7 ноябрь куни ташқи интернетдан узилиб қолди. Бу ҳақда, «Ўзбектелеком» матбуот хизматига асосланиб, «Газета.uz», UZ24, UzNews ва «Правда Востока Онлайн» хабар бермоқда.
«Правда Востока Онлайн»нинг ёзишича, соат 13:50 дан бошлаб, UZ24 ва UzNews хабарига кўра, соат 14:00 дан бошлаб, «Газета.uz» маълумотига кўра, соат 14:15 дан бошлаб интернетга уланиш имконсиз бўлиб қолган. UZ24 фақат Tas-ix зонасидаги сайтларга кириш мумкин бўлгани ҳақида ёзмоқда.
Ушбу носозлик, «Газета.uz», UzNews ва «Правда Востока Онлайн» маълумотига кўра, 14:40 га қадар, UZ24’нинг ёзишича, соат 14:45 га қадар давом этган. Нашрларнинг «Ўзбектелеком»га асосланиб хабар беришича, мазкур узилиш «қўшни давлат ҳудудидаги режадан ташқари авариявий-қайта тиклаш ишлари сабаб» юз берган.
«Ўзбектелеком» ноқулайлик учун узр сўраб, эҳтимолий узилишлар 8 ноябрь, чоршанба куни ҳам кузатилиши мумкинлигини маълум қилди, деб ёзади тўртала нашр.
Эътиборли томони, тўрт нашр орасида фақат UZ24 «Ўзбектелеком» сайтидаги тегишли хабарга ҳавола берган, бироқ хабарнинг ўзи сайтда йўқ (катта эҳтимол билан, ўчириб ташланган).
Изоҳ (0)