АҚШнинг Тошкентдаги элчихонаси Ўзбекистон Нью-Йоркда содир этилган терактни тафтиш қилишда ёрдам беришга тайёрлиги ҳақидаги таклиф учун Президент Шавкат Мирзиёевга миннатдорлик билдирди. Бу ҳақда элчихонанинг Facebook’даги саҳифаси чоп этилган баёнотда айтилди.
Эслатиб ўтамиз, Ўзбекистон Президенти Шавкат Мирзиёев Нью-Йоркдаги теракт муносабати билан АҚШ президенти Дональд Трампга ҳамдардлик йўллади.
«Ушбу шафқатсиз жиноятни ҳеч қандай йўл билан оқлаб бўлмайди. Биз экстремизм ва терроризмнинг ҳар қандай шакли ва кўринишини қаттиқ қоралаймиз», — деб ёзади Ўзбекистон Президенти.
У содир бўлган фожиа бу каби ноинсоний замонавий таҳдидларга қарши курашда халқаро ҳамжамиятнинг барча кучларини бирлаштириш зарурлигини яна бир тасдиқлашини таъкидлаб ўтди.
«Ўзбекистон ўз томонидан мазкур террористик актни тергов қилишда кўмаклашиш учун барча куч ва воситаларни ишга солишга тайёр», — дейилади Шавкат Мирзиёев мактубида.
Изоҳ (0)