Идишларни ювишни кўпинча кейинга қолдиришни хоҳлаймиз, лекин маълум бўлишича бу саломатликка ҳам, қоматга ҳам зарар келтирар экан.
Корнелл университети тадқиқотчиларининг маълумотларига кўра, йиғиштирилмаган ифлос ошхонада биз одатдагидан деярли икки баравар кўпроқ калория истеъмол қилар эканмиз.
Олимлар қатнашчиларни икки гуруҳга ажратиш йўли билан тажриба ўтказдилар. Аввал биринчи гуруҳдагилардан ҳаётларининг ўзларини дадил ва қатъий ҳис қилган даврини, иккинчи гуруҳдагилардан эса — ҳаётлари издан чиққандек бўлиб кўринган даврини тасвирлаб беришларини сўрашди.
Кейин қатнашчиларнинг ярмини йиғиштирилмаган тартибсиз ошхонада кутиб туриш учун қолдиришди. Қолган ярмини эса тозалик ва жимжитлик ҳукм сурган ошхонага жойлаштиришди. Иккала ошхонада ҳам қатнашчилар ширин печеньелар, крекер ёки сабзилар билан тамадди қилишларига рухсат берилди.
10 дақиқа давомида йиғиштирилмаган ошхонадаги стрессли вазиятларни эсга олувчи қатнашчилар тоза шароитдаги кутувчиларга қараганда 53 ккал кўпроқ калория истеъмол қилишди.
Тартибсиз шароит, стресс ва чорасизликни ҳис қилиш ҳолати — тўғри овқатланишнинг душманлари.
«Бундай вазиятда биз: ‘Агар ҳаммаси жойида бўлмаса, нима учун мен ўзимга эътибор беришим керак?’ — деб ўйлай бошлаймиз», — дейди тадқиқот бош муаллифи, руҳшунос Ленни Вартанян.
Ҳаётларининг ўзларини дадил ҳис қилган даврини эслаган қатнашчилар, умумий ҳисоблаганда 100 ккал камроқ истеъмол қилдилар. Бу анча хотиржамроқ ҳолатда биз ортиқча ейишни хоҳламаслигимизни яна бир марта исботлади.
Ошхонадаги тозалик ва тартиблилик эса бизга стрессни камайтиришга ёрдам беради. Йиғиштириш, шу жумладан идишларни ювиш бизни тинчлантиради ва кайфиятимизни яхшилайди.
Манба: Trendymen
Изоҳ (0)