Футбол бўйича Ўзбекистон Олий Лигасининг 2018 йилги мавсумида 12 та клуб чемпионлик учун кураш олиб боради. Бу ҳақда ЎФФ матбуот хизмати ташкилот Ижроқўми қарорига асосланиб маълумот берди.
Унга кўра, чемпионат ўйинлари 3 даврали бўлади. Дастлабки икки давра давомида жамоалар 11 та уй ва 11 та сафар ўйинида иштирок этади. 3-давра олдидан эса мезбон жамоалар қуръа ташлаш йўли билан аниқланади. Демак, Олий Лига клублари 1 та мавсумда 33 та ўйинда иштирок этади.
2017 йилги мавсум якунларига кўра, Олий Лигада 1—11-ўринларни эгаллаган клублар ўз ўрнини сақлаб қолади. Қолганлар эса Биринчи Лигага сургун қилинади. Ўз навбатида, Биринчи Лига чемпиони Олий Лигага қўшилади.
Ваҳоланки, 2017 йилги мавсум старти арафасида ҳеч бир клуб бундан огоҳлантирилмаганди. Шу тариқа Биринчи Лигадан чиқиш учун 2-ўринга ҳам кураш кетаётган, Олий Лига клублари эса 15—16-ўринларни олмасликка интилаётганди.
ФИФА «Шўртан»ни Олий Лигадан четлаштиришни сўрагани ва ПФЛ «Обод»ни элитадан четлаштириб улгургани инобатга олинса, Олий Лигада 14 та жамоа қолиши керак эди. Энди эса улар қаторига Олий Лига турнир жадвалининг ҳозирги ҳолатидан келиб чиқиб, Фарғонанинг «Нефтчи» ва Жиззахнинг «Сўғдиёна» клублари ҳам қўшилиб қолиши катта эҳтимол.
Қабул қилинган қарордан қониқиш ҳосил қилдим. Чунки у бир томонлама қабул қилинмади. Биз киритилган ҳамма таклиф ва мулоҳазаларни ўрганиб чиқдик, янги формат бизнинг шароитга қандай тўғри келишини аниқладик. Якунда 12 та клуб қатнашадиган мусобақа вариантида тўхтадик.Энди Ўзбекистон Биринчи Лигасида 16 та клуб қолади. Бунда ҳар бир вилоятдан камида 1 тадан футбол клуби бўлиши таъминланади. У асосан ёшлар ўйнайдиган, Олий Лига ҳамда термаларга футболчи етказиб берадиган фабрикага айланади.Мен қарор қабул қилинишида иштирок этган ҳар бир эксперт ва ОАВ вакилларига ўз миннатдорчилигимни билдираман.
Умид Аҳмаджонов, ЎФФ президенти
Ўзбекистон чемпионати ва уни ўтказиш тизими ислоҳга муҳтож эди. Унда рақобатбардош жамоалар сонини кўпайтириш орқали, соғлом рақобатни кучайтириш ва Олий Лига ўйинларини томошабоп даражага олиб чиқиш учун ислоҳотлар амалга ошириш жуда муҳим эди.Шу ҳафта барча клубларга ОФК ва ЎФФ ҳужжатлари асосида тайёрланган ҳужжатлар юборилади. Ундаги талабларга жавоб бера олмаган ёки уларни бажаришда кечиккан футбол клублари мусобақаларга қўйилмайди.Умид Аҳмаджонов, ЎФФ президенти
Изоҳ (0)