Россиядан чиқиб, Сурия ҳамда Ироқда жанг қилаётган ИШИД террорчилик ташкилоти сафига бориб қўшилган фуқаролар йўқ қилинаётган жиноятчилар ҳисобланади. Бу ҳақда Россия президентининг матбуот котиби Дмитрий Песковга асосланиб «РБК» хабар берди.
«Террорчиларга қўшилганлар ва террорчилик фаолиятига алоқаси борлар, қўлларида қурол билан Сурия қуролли кучларига қаршилик кўрсатаётган ёки бизнинг операциямизда иштирок этаётган россиялик ҳарбийларга қарши қуролларини йўналтирганлар — булар жиноятчилардир, улар йўқ қилинмоқда», — деди Песков.
Президент матбуот котибининг сўзларига кўра, бу каби шахслар ҳақида Россия Мудофаа вазирлиги ҳар куни Кремлга хабар бермоқда.
Soufan Group таҳлилий агентлининг 2017 йил октябрь ойидаги маълумотларига кўра, ИШИД таркибида Ироқ ва Сурияда жанг қилаётган россиялик жангарилар сони 3 417 нафарни ташкил этмоқда.
Бу террорчилик ташкилоти таркибида жанг қилаётган хорижлик давлатдан бўлган фуқароларнинг энг кўп кўрсаткичидир. Иккинчи ўринда Саудия Арабистони бўлиб, мамлакатнинг 3 244 нафар фуқароси жангарилар сафида, учинчи ўринда эса иорданияликлар — 3 минг жангари.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)