Канада расмийлари терроризмда янглиш айбланган уч фуқарога 31,3 миллион Канада доллари (25 миллион АҚШ доллари атрофида) тўлади. Бу ҳақда «ТАСС» хабар бермоқда.
Гап 2001—2003 йилларда Сурия ва Ироқда бўлган Абдуллоҳ Ал-Маликий, Аҳмад ал-Маатий ва Муайд Нуриддин ҳақида бормоқда. Уларнинг адвокатлари 100 миллион Канада доллари (80 миллион АҚШ доллари) миқдорида товон тўланишини талаб қилганди.
CTV телеканалига кўра, улар Канада махсус хизматлари томонидан номлари халқаро террорчилар рўйхатига киритилганидан сўнг Сурия ва Ироқда ҳибсга олинган. Жумладан, Оттавада истиқомат қилган муҳандис Абдуллоҳ Ал-Маликий 2002 йилдан бошлаб 22 ойни Сурия қамоқхонасида ўтказган ва қийноқлар остида «Ал-Қоида»га «алоқадорлиги»ни тан олган.
2008 йилда Канада олий судининг собиқ судьяси ҳаракати билан бошланган текширув давомида Канада ТИВ, хавфсизлик хизмати ва миллий полиция хатога йўл қўйгани, бу эса мазкур фуқаролар ноқонуний қўлга олинишига олиб келгани маълум бўлди.
Жорий йил март ойида Канада ташқи ишлар вазири Христа Фриланд ҳамда жамоат хавфсизлиги ва фуқаро ҳимояси вазири Ральф Гудейл томонидан улардан кечирим сўралди.
Изоҳ (0)