13 октябрь куни Э-СУД миллий электрон судлов ахборот тизимидан фойдаланиш самарадорлигини ошириш мақсадида фуқаролик ишлари бўйича Фарғона водийсидаги 15 та туманлараро судларга 57 комплект замонавий компьютер топширилди. Бу ҳақда АҚШнинг Ўзбекистондаги элчихонаси матбуот хизмати хабар бермоқда.
Шу муносабат билан фуқаролик ишлари бўйича Фарғона туманлараро судида тантанали маросим бўлиб ўтди. Унда Ўзбекистон Республикаси Олий суди раисининг ўринбосари - фуқаролик ишлари бўйича судлов ҳайъати раиси Холмўмин Ёдгоров, АҚШнинг Ўзбекистондаги фавқулодда ва мухтор элчиси Памела Спратлен, БМТ Тараққиёт дастурининг Ўзбекистондаги доимий вакили ўринбосари Фарид Караханов иштирок этди.
Янги техника Ўзбекистон Республикаси Олий суди, АҚШ халқаро тараққиёт агентлиги, БМТ Тараққиёт дастури томонидан қўллаб-қувватлаб келинаётган «Ўзбекистонда қонун устуворлиги йўлида ҳамкорлик» қўшма лойиҳаси доирасида тақдим этилди.
Умумий нархи 60 минг АҚШ долларини ташкил этган техника Э-СУД инновацион электрон ахборот тизимига уланиш имконини яратади. Бу эса ишларни кўриб чиқишда сарфланадиган вақтни оптималлаштириш ва фуқароларнинг одил судловга эришиш даражасини оширишга туртки бўлади.
Э-СУД миллий электрон судлов ахборот тизими 2013 йилда ишлаб чиқилган бўлиб, аввал бошлаб фақатгина биттагина судда ишлаган. Бугунги кунга келиб бутун мамлакат бўйича 950 га яқин мутахассислар Э-СУД тизимидан фоқдаланишни ўргатишга бағишланган тренингларда ўз билим ва кўникмаларини оширди ва ҳозирда Э-СУД тизимига республиканинг барча 75 та фуқаролик ишлари бўйича судлари уланган. Э-СУД тизимининг жорий этилиши натижасида хизмат кўрсатиш самарадорлиги 50 фоизга ошди ва ҳужжатларнинг йўқотиб қўйилиши ҳолати умуман бартараф этилди.
Изоҳ (0)