Ўзбекистон Президенти Шавкат Мирзиёев қонунчиликка жиноят содир этилишига алоқадор бўлмаган шахслар мулкини мусодара этишни ман этувчи тузатишлар киритувчи қонунни имзолади. Бу ҳақда «Газета.uz» хабар бермоқда.
Жиноий-процессуал кодекснинг янгиланган ва кенгайтирилган 211-моддаси 1-қисмига кўра, гумонланувчи, айбланувчи, судланувчи, маҳкумга тегишли жиноят қуроли мусодара этилади ва тегишли муассасалар ихтиёрига топширилади ёки йўқ қилинади.
Санаб ўтилган шахсларга тегишли бўлмаган мулк унинг қонуний эгалари, мулкдорлар, ворислар ва меросхўрларга қайтарилади. Улар аниқланмаган тақдирда эса давлат ихтиёрига ўтказилади.
Жиноий-процессуал кодексга киритилган мулк мусодарасига оид тузатишлар ҳукми кучга кирган жиноий ишларга тегишли эмас.
Маълумот учун, модданинг аввалги таҳририда «Жиноят қуроли мусодара этилади» деб қайд этилган, бу эса баъзан мулк унинг эгаси хабарсиз ҳолатда давлат фойдасига мусодара этилишига олиб келарди.
Изоҳ (0)