Фарғона вилоятида туризм инфратузилмасини яхшилаш, янги сайёҳлик йўналишлари очиш ва туризм ҳудуди ташкил этиш борасида муайян ишлар амалга оширилмоқда. Бу ҳақда ЎзА хабар берди.
Вазирлар Маҳкамасининг «Фарғона вилоятининг Марғилон, Қўқон шаҳарлари ва Риштон туманида ҳунармандчиликни янада ривожлантириш чора-тадбирлари тўғрисида»ги қарори асосида 2017—2019 йилларда халқ бадиий ҳунармандчилиги ва амалий санъатни янада ривожлантириш кўзда тутилган комплекс чора-тадбирлар дастури ишлаб чиқилди.
Марғилон шаҳрида атлас, адрас тўқимачилиги, читгарлик, ёғоч ўймакорлиги, косибчилик ва ипакдан гилам тўқиш ишларига эътибор янада кучайтирилди. Қўқон шаҳрида ёғоч ўймакорлиги, пичоқчилик, заргарлик, кандакорлик, темирчиликни, Риштон туманида кулолчилик, чинни маҳсулотлари, мусаввирликни оммалаштириш ва сайёҳларни жалб қилишга қаратилган тадбирлар белгиланди.
Дастурга кўра, туризм марказлари барпо этилиб, уларга ёғочсозлик ва ёғоч ўймакорлиги, тўнчилик, мисгарлик, темирчилик сингари ҳунарлар билан шуғулланиб қелаётган сулолалар жалб қилинади. Туристлар учун карвонсаройлар (меҳмонхона), ошхона ва бошқа кўнгилочар жойлар ташкил этилади. Қадимги шарқ бозори услубида қурилган бозор расталари, фойтун ва арава қатнови йўлга қўйилиши ҳам миллий анъаналар тимсолига айланади.
Чора-тадбирлар дастурига асосан 2017—2019 йилларда амалга ошириладиган 40 дан ортиқ лойиҳа, 10 меҳмонхона қурилишига 26 миллиард 910 миллион сўм маблағ жалб этилади.
Айни кунларда Марғилон шаҳридаги Silk Tkat and Carpet масъулияти чекланган жамиятида ипак гилам ишлаб чиқариш, «Олтин водий дурдоналари» туристик йўналишини ташкил этиш, ҳунармандликнинг йўқолиб бораётган йўналиши—читгарликни қайта тиклаш борасида ишлар бошлаб юборилди. Шаҳарнинг Хиёбон кўчасида «Карвонсарой — ҳунармандлар маркази», Қўқон шаҳридаги «Жомеъ» тарихий ёдгорлиги масжидида «Қўқон адабий, бадиий, маънавий-маърифий муҳити маркази», «Фарғона — Марғилон мақом маркази»ни ташкил этиш, 50 ўринга мўлжалланган меҳмонхона қуриш ишлари бажарилади.
Изоҳ (0)