«Россия темир йўллари» («РЖД») компанияси Владимир вилоятидаги авария оқибатида жабрланган Ўзбекистон фуқароларига 5 минг рубль (тахминан 85 доллар)дан компенсация пули тўлади. Бу ҳақда, компания матбуот хизматига таяниб, UzNews хабар бермоқда.
«Барча жабрланувчиларга Россия Фавқулодда вазиятлар вазирлиги томонидан зарур тиббий ва руҳий ёрдам кўрсатилди, иссиқ кийимлар берилди, улар қуруқ паёклар билан таъминланди. Шунингдек, ҳар бир жабрланувчига ‘Россия темир йўллари’ компанияси ҳисобидан 5 минг рубль миқдорида компенсация тўланди», — дейилади хабарда.
Эслатиб ўтамиз, 6 октябрь куни Россиянинг Владимир вилоятида поезд ва асосан ўзбекистонлик йўловчилар кетаётган автобус ўртасида тўқнашув юз берган эди. Ҳодиса оқибатида 17 киши, жумладан, 16 нафар Ўзбекистон фуқароси ҳалок бўлган.
Шахси аниқланган 15 жасад ва 36 жабрланувчи 8 октябрь куни Ўзбекистоннинг махсус самолётида Ватанга қайтарилган эди. Бир жасаднинг шахсини аниқлаш ишлари давом этмоқда, аҳволи оғир уч ўзбекистонлик эса даволанишни Россияда давом эттиради.
Изоҳ (0)