Норин туманида қишлоқ оилавий поликлиникаси тақдимоти ўтказилди. Бу ҳақда «Дарё»га Наманган вилоят соғлиқни сақлаш бошқармаси матбуот хизмати маълум қилди.
19-сонли қишлоқ оилавий поликлиникасининг фойдаланишга топширилиши ҳудуд аҳолиси учун катта воқеа бўлди. Илгари «Норинкапа»да истиқомат қилувчилар 20 километрдан ортиқ йўл босиб, туман кўп тармоқли марказий поликлиникасига қатнар эди. Энди қатор ихтисосликлар — педиатр, стоматолог, жарроҳ, терапевт, акушер-гинеколог ва УТТ шифокорлари «Боғ» маҳалласида жойлашган поликлиникада одамларнинг узоғини яқин қилмоқда.
«Норинкапа», «Сой бўйи», «Истиқлол», «Янги Фарғона», «Чангитма», «Хўжақўрғонча» маҳаллаларида истиқомат қилувчи 17 минг нафардан ортиқ аҳоли учун хизмат қилувчи икки қаватли янги тиббиёт масканида барча шарт-шароитлар мавжуд.
Тез тиббий ёрдам шохобчаси ҳам поликлиника биносига жойлашди, 3 та бригада туну кун эл хизматида. Кундузги шифохона, стоматология хизмати, ультратовуш текшируви, лаборатория энг янги тиббиёт анжомлари билан таъминланди. Бинони таъмирлаш учун 130 миллион сўмдан ортиқ маблағ сарфланди.
Мазкур қишлоқ оилавий поликлиникасида «Электрон поликлиника» тизими жорий этилади.
Изоҳ (0)