Ўзбекистон Президенти қарори билан фаолиятини 10 йил давомида сақлаш шарти билан активлари хусусийлаштириш тартибида савдоларда сотиладиган давлат тиббиёт муассасалари рўйхати тасдиқланди. Бу ҳақда Norma хабар бермоқда.
Рўйхатга жами 48 та объект, жумладан, Тошкент шаҳридаги икки стоматология поликлиникаси киритилган. Бундай қарор қабул қилинишига мазкур муассасалар фаолиятининг самарасиз эканлиги сабаб бўлгани билдирилмоқда. Шунингдек, хусусий тиббий хизматлар улушини кўпайтириш режалаштирилмоқда.
Келгусида ушбу объектлар базасида замонавий тиббий хизматлар кўрсатадиган хусусий клиникалар фаолият кўрсатади. Хусусийлаштириш давомида иш ўринлари сақлаб қолиниши, бу талаб бажарилишини Рақобат қўмитаси Соғлиқни сақлаш вазирлиги билан биргаликда таъминлаши кўзда тутилган.
Қарорда хусусийлаштириш жараёнида савдо иштирокчилари таклифлари мутаносиб бўлган тақдирда тиббий муассаса меҳнат жамоаси аъзосига устунлик берилиши кўрсатиб ўтилган.
Изоҳ (0)