Шоакром Исроилов ЎзДЖТИ ректорлигидан кетди. У энди ЎФФ президентининг биринчи ёрдамчиси бўлди

Ўзбекистон футбол федерацияси вице-президенти сифатида таништирилган Шоакром Исроилов Ўзбекистoн давлат жисмоний тарбия институти ректорлигидан кетган. Бу ҳақда журналистлар билан матбуот анжуманида ЎФФ президенти Умид Аҳмаджонов маълум қилди.

15 кун аввал бўлиб ўтган ЎФФнинг ҳисобот-сайлов конференциясида янги президент Умид Аҳмаджоновнинг ўринбосарлари таништирилганди. Журналистлар шу масалага эътибор қаратиб, ўринбосарларнинг асосий иши умуман бошқа экани, улар кун-у тун футбол ҳақида ўйлай олмаслиги борасидаги савол билан мурожаат қилди.

Янги жамоа тузаяпмиз. Шоакром Исроилов жисмоний тарбия институтидаги ишидан кетиб, тўлиғича ЎФФга ўтди. Айнан шу инсон менинг биринчи ёрдамчим бўлади. Бундан ташқари, маслаҳатчи лавозимини ҳам жорий қилмоқчимиз.

Умид Аҳмаджонов, ЎФФ президенти

Маслаҳатчи ким бўлиши масаласига Умид Аҳмаджонов ойдинлик киритмаган. Қайд этиш керак, бунга қадар ташкилот вице-президентлари сифатида ишлаб келган Сардор Раҳматуллаев ҳамда Асқар Толибжоновнинг кейинги тақдири ҳанузгача ошкор қилинмаган. Улар ишдан кетгани ёки ишида сақлаб қолингани борасида аниқ маълумот йўқ.