Таниқли жамоат арбоби Аҳмаджон Одилов 92 ёшида Наманган вилояти Поп туманидаги уйида вафот этди. Ўзбекистонда хизмат кўрсатган пахтакор, Социалистик Меҳнат қаҳрамони Аҳмаджон Одиловнинг жанозаси 27 сентябрь куни Ғурумсаройда ўқилган.
Аҳмаджон Одилов 1925 йили Ғурумсаройда туғилган. 1960—1970 йилларда Поп туманидаги Ленин номли жамоа хўжалигига раислик, 1970 йиллар охирида Поп туман agrosаноат комплексига раҳбарлик қилган.
1980 йиллар ўрталарида қўзғатилган «Пахта иши» бўйича айбланиб, қамоққа олинган, Москвадаги Бутирка қамоқхонасида сақланган. 1991 йил декабрида қамоқдан озод этилган, бироқ 1993 йил июнида яна озодликдан маҳрум этилган. Шу билан 2008 йил июнида — 83 ёшида озодликка чиққан.
У собиқ Иттифоқ даврида «Социалистик меҳнат қаҳрамони» унвони, уч марта «Ленин» ордени, бир марта «Октябр инқилоби» ордени билан тақдирланган.
«Коммерсантъ» газетасининг 1991 йил апрель сонларидан бирида Аҳмаджон Одиловнинг СССР Олий судида бўлиб ўтган суди мажлисидан тафсилотлар эълон қилинган. «Одилов: Мен алоҳида бир қишлоқда капитализм қурдим» сарлавҳали мақолада, жумладан, Аҳмаджон Одилов терговни фақат ўзбек тилида олиб боришни, шунингдек, судга Чингиз Айтматов ва СССР президенти Михаил Горбачёвнинг келишини талаб қилгани ҳақида сўз боради.
Изоҳ (0)