O‘zbekiston Fanlar akademiyasi Botanika va zoologiya instituti bazasida ikkita alohida ilmiy muassasa — Botanika instituti va Zoologiya instituti tashkil etildi. Bu O‘zbekiston Prezidentining joriy yil 4-sentabrdagi qarorida ko‘zda tutilgan deya xabar beradi “Gazeta.uz”.
Qaror botanika va zoologiya sohasidagi ilmiy tadqiqotlarni takomillashtirish va samaradorligini oshirish, respublika o‘simlik va hayvonot olami bioxilma-xilligini saqlash, zamonaviy fan va iqtisodiyot tarmoqlarining talablaridan kelib chiqqan holda botanika va zoologiyaning alohida yo‘nalishlarini rivojlantirish, shuningdek, o‘simlik va hayvonot olamini o‘rganish hamda muhofaza qilish borasidagi maxsus vazifalar yechimini tezlashtirish maqsadida qabul qilindi.
Qarorga muvofiq, FA Genetika va o‘simliklar eksperimental biologiyasi institutining “G‘o‘za sistematikasi va introduksiyasi” laboratoriyasi, “G‘o‘za genofondi” obyekti va issiqxona kompleksini Botanika instituti tasarrufiga o‘tkazish belgilandi.
Ma’lumot uchun, Botanika va zoologiya instituti (avval — O‘simlik va hayvonot dunyosi genofondi instituti) 2012-yilda “Botanika” ilmiy-ishlab chiqarish markazi (2001-yilda tashkil topgan) va Zoologiya instituti (1950-yilda asos solingan) birlashtirilishi natijasida tuzilgandi.
Izoh (0)