Москва АҚШнинг БМТни ислоҳ қилиш бўйича декларациясини имзолаши эҳтимолдан йироқ. Бу ҳақда Россиянинг халқаро ташкилотдаги доимий вакили Василий Небензя маълум қилди, дея хабар беради «ТАСС».
Небензяга кўра, БМТ ислоҳоти декларациялар қабул қилиш билан эмас, барча аъзо давлатларнинг ҳукуматлараро музокаралари жараёнида амалга оширилади. Мазкур ҳужжат илгари сурилишидан аввал ва ундан кейин ҳеч қандай маслаҳатлашув бўлмагани сабабли уни аъзо давлатларнинг ҳамммаси ҳам имзоламаслиги мумкин.
«БМТ глобал ислоҳотларга эмас, фаолиятининг яхшиланиши ва самарадорлиги оширилишига муҳтож. Ҳар қандай бюрократик ташкилот қотиб қолмаслиги, балки доимо янгиланиб бориши зарур. Зеро, барчамиз БМТнинг халқаро саҳнада роли ошиб бориши тарафдоримиз. Ташкилотга ислоҳотлар керак, аммо кескин ва оламшумул ўзгаришлар эмас», — таъкидлади Россиянинг БМТдаги доимий вакили.
Олдинроқ АҚШ президенти Дональд Трамп 18 сентябрь куни Нью-Йоркда дунёнинг етакчи раҳбарлари билан учрашиб, БМТни ислоҳ қилиш билан боғлиқ масалаларни муҳокама қилиши, учрашувга 10 та банддан иборат декларацияга имзо чеккан етакчилар таклиф қилиниши билдирилганди.
Изоҳ (0)