Тошкент шаҳрининг бир нечта туманларида ёлғиз яшовчи кексаларнинг хонадонига келиб, уларга ўзини янги қўшниси ёки лифт устаси сифатида таништириб, уй телефони орқали қўнғироқ қилиб олиш, ҳожатхонага кириб чиқиш ҳамда шу каби бошқа баҳоналар билан киришга эришиб, пиёз тўғраб беришни сўраб чалғитган ҳолда, хонадонларда ўғрилик содир этган шахс қўлга олинди, деб хабар берди Тошкент шаҳар ИИББ матбуот хизмати.
Мазкур ҳолатлар юзасидан Ўзбекистон Республикаси Жиноят Кодексининг 169-моддаси (ўғрилик, яъни ўзганинг мол-мулкини яширин равишда талон-торож қилиш) аломатлари билан жиноят иши қўзғатилган.
Юқорида қайд қилинган жиноятларни фош қилиш, жазо муқаррарлигини таъминлаш мақсадида, Тошкент шаҳар ИИББ ва унинг тизимларида хизмат олиб борувчи барча шахсий таркиб эътибори мазкур жиноятларга қаратилган ҳолда, шаҳар миқёсида кенг қамровли тезкор қидирув чора-тадбирлари ўтказилди.
Юқорида кўрсатилган тергов-тезкор тадбирлари натижасида, мазкур жиноятларни содир қилган шахс — 1965 йилда Сурхондарё вилоятида туғилган, ўғрилик ва бошқа турдаги жиноятлар содир қилганлиги учун судланган Ғафуржон Тошев эканлиги аниқланиб, далилий ашёлар билан қўлга олинди.
Август ойининг охирларида ИИББ Тошкент шаҳридаги кекса фуқароларни ўз уйларига бегона шахсларни киритмасликлари ҳақида огоҳлантирган эди.
Изоҳ (0)