Сурхондарё вилоятида жорий йилнинг 11—13 сентябрь кунлари Ўзбекистон Президенти девонининг Фуқаролар ҳуқуқларини ҳимоя қилиш, жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизмати масъул ходимлари, турли вазирлик, муассаса ва идоралар, маҳаллий ҳокимлик, давлат ва жамоат ташкилотларининг раҳбарлари иштирокида сайёр қабуллар ўтказилди. Бу ҳақда ЎзА хабар берди.
Сайёр қабулларнинг бирида Термиз шаҳри Наврўз маҳалласида яшовчи М.Тиллаеванинг мурожаати ҳал қилинди. Унинг турмуш ўртоғи буйрак-тош касаллигига чалинган, II гуруҳ ногирони бўлиб, 16 марта операция қилинган.
Айни вақтда яна даволанишга муҳтож, бироқ оиланинг маблағи йўқлиги сабабли.сайёр қабул вақтида аёл шу масалада ёрдам сўраб мурожаат қилган. Мурожаат ижобий қондирилиб, аёлнинг турмуш ўртоғига Тошкент шаҳрида бепул даволаниш учун йўлланма берилди.
Сайёр қабулда фуқароларнинг 900 га яқин мурожаати кўриб чиқилиб, аксарияти жойида ўз ечимини топган.
Сурхондарё вилоятидан жорий йилнинг ўтган даврида Ўзбекистон Президентининг Виртуал қабулхонасига юборилган мурожаатларнинг 14930 таси вилоятда ўз ечимини топган. Ҳал этилиши вақт талаб этадиган 527 та мурожаат ўрганиб чиқилмоқда.
Президентнинг вилоятдаги Халқ қабулхоналарига фуқаролар ва хўжалик юритувчи субъектлардан 17248 та ариза, 14019 та шикоят ва 98 та таклиф келиб тушган. Уларнинг 11154 таси қаноатлантирилиб, 1470 таси рад этилган. 14574 тасига тушунтириш берилиб, 4167 таси тегишли тартибда ўрганиб чиқилмоқда.
Изоҳ (0)