Илгари хабар қилинганидек, Ўзбекистон Президенти Шавкат Мирзиёевнинг 2017 йил 2 сентябрдаги «Валюта сиёсатини эркинлаштириш бўйича дастлабки чоралар тўғрисида»ги фармонига асосан, 2017 йил 5 сентябрдан бошлаб Ўзбекистон Республикаси резидентлари — жисмоний шахслардан валюта алмаштириш шохобчаларида эркин равишда валюта сотиб олиш бошланади. «Kommersant.uz» сайтида иқтисодиётчи Юлий Юсуповнинг мазкур янгиликка муносабати эълон қилинди.
Иқтисодиётчилар зарурлиги ҳақида кўпдан (1996 йилдан) бери гапириб келган нарса амалга ошди!
Ўзбекистонда ниҳоят миллий валютанинг жорий операциялар бўйича эркин конвертацияси жорий этилди!
Ҳа, жисмоний шахслар ҳозирча валютани нақд ололмайди — у фақат картага ўтказилади. Лекин бунинг ҳал этилиши вақт масаласи эканлигига ишончим комил. Юридик шахслар эса импорт, тушум репатриацияси, кредитларни ёпиш учун валютани тўсиқсиз сотиб олиш имкониятига эга бўлмоқда.
Жорий операциялар бўйича эркин конвертациянинг жорий этилиши, ниҳоят, аксилбозор буйруқбозлик бошқарув тизимининг «белини синдириш», иқтисодиётимиздан ҳаётий кучни сўриб олаётган кўплаб «ёғли жойлар» учун асосларни вайрон этиш, тадбиркорлик ривожи йўлидаги кўплаб тўсиқларни бартараф қилиш, иқтисодий ислоҳотларни давом эттириш учун йўл очиш имконини беради.
Ва бу фақат бошланиши. Ҳали жуда кўп иш қилиш керак. Олдинда банк, солиқ, ташқи савдо, маъмурий, аграр ва бошқа ислоҳотлар турибди, самардор рақобат муҳити шаклланиши ва хусусий мулк ҳуқуқини ҳимоя қилиш бўйича тизимли чоралар кўриш керак.
Аммо биз бу йўлдан ўтиб, маданиятли, рақобатбардош, бой иқтисодиёт яратамиз!
Жаноб амалдорларга ҳам бир-икки оғиз ёқимли гап айтгим келяпти.
Номаълумлик ишбилармон фаоллигини ўлдиради, аниқроғи, уни фақат бир томонга йўналтиради: қандай қилиб жамғармани сақлаб қолиш ва қандай қилиб бирор нима билан спекуляция қилиш. Охирги ойларда тадбиркорларимиз нима билан шуғулланди? Кимдир шоша-пиша доллар, кимдир, аксинча, сўм харид қилди, кимдир шоша-пиша кредит олди, кимдир ҳеч нарсага қарамай кўчмас мулк, техника ва ҳ.к. сотиб олди. Реал иқтисодиёт эса тўхтаб қолди. Реал иш билан шуғулланишни ҳеч ким хоҳламади ва шуғуллана олмас ҳам эди, негаки бир-икки ойдан сўнг мамлакатда нима бўлиши тушунарсиз эди.
Шунинг учун, жаноб амалдорлар, агар иқтисодиётимизни кўмишни хоҳламасангиз,
1) имкон қадар максимал очиқ ва тушунарли сиёсат юритинг, жамоатчиликни нима қилаётганингиз ва қилмоқчилигингиздан бохабар қилинг;
2) валюта либераллашуви сингари ислоҳотларни (яна имкон қадар) бир лаҳзада ва тез ўтказинг, бу «роҳат»ни узоқ ойларга чўзманг. Агар босқичма-босқич ишлашда қандайдир плюслар бўлса ҳам, улар номаълумлик туфайли реал ишбилармон фаолликнинг тушиб кетиши билан боғлиқ кўплаб минуслар билан йўққа чиқарилади.
Изоҳ (0)