ЖЧ—2018. Қурбон ҳайити сабаб БАА ва Саудия учрашуви бугун бўлиб ўтади

Бугун — 29 август куни ЖЧ—2018 йўлланмаси учун кураш олиб бораётган БАА ва Саудия Арабистони терма жамоалари ўзаро майдонга тушади.

Саралашнинг барча учрашувлари ФИФА белгилаб қўйган 31 август санасида ўтиши керак эди. Бироқ шу куни Қурбон ҳайити нишонланади. Шундан келиб чиқиб, Амирлик термасининг Саудия билан ўйини икки кун олдинроққа сурилди.

Томонларнинг Саудияда кечган илк ўйинида мезбонлар йирик — 3:0 ҳисобида зафар қучганди. «Саҳро лочинлари» сафар учрашувини ҳам ўз фойдасига ҳал қилса, Россия мундиали чиптасини деярли қўлга киритади.

БАА эса ўтган турдаги муваффақиятсизлик сабаб терманинг бир неча йиллик мураббийи Маҳдий Алини истеъфога чиқарганди. Амирлик термаси ҳеч бўлмаганда 3-йўлланма учун умидни сақлаб қолишни истаса, бугун фақат ва фақат зафар қучиши талаб этилади.

31 август куни пешқадамлардан Япония ўз майдонида Австралияни қабул қилса, Ироқ Таиланд билан ўйин учун Бангкокка ташриф буюради.

ЖЧ—2018. Саралаш «B» гуруҳи. 9-тур 29 август, сешанба

БАА — Саудия Арабистони