Тошкентнинг Яшнобод туманидаги «Авиасозлар» бозорига Миллий банк томонидан ўрнатилган банкомат 23 август куни бир неча соат давомида ишламади. Бу ҳақда «Дарё» мухбири маълум қилди.
Банкоматдан нақд пул олиш мақсадида келган аёллардан бирининг соат 12:00 да «Дарё» мухбирига маълум қилишича, у банкоматдан пул ечиб олиш мақсадида 8:00 да бозорга келган, лекин банкомат ишламай қолган.
Банкоматдан пул ечиб олиш учун соат 8:00 дан бери шу ердаман. Эрталаб икки киши пул ечиб олди. Нимадир нотўғри босилди, шекилли, шундан кейин банкомат ишламай қолди. Кейин банкка қўнғироқ қилинди. Улар: «Бир соатларда келиб тузатамиз», дейишди. Аммо, мана, соат 12:00 бўлди ҳамки, улардан дарак йўқ.Бозорда олинган видеода банкомат ишламаётганига қарамай, унинг ишлаб қолишидан умид қилган одамларнинг кичик бўлмаган навбатини кўриш мумкин.«Авиасозлар» бозоридаги банкомат мижози
Мавзуга доир: Видео: Қўйлиқ бозоридаги нақд пул банкоматига навбат
Кейинчалик Тошкентнинг яна етти бозорига банкоматлар ўрнатилгани маълум қилинди. Хусусан, «Аския» ва «Бўзбозор» бозорларига «Ипотека-банк» томонидан, «Авиасозлар», «Қорақамиш» ва Сергели деҳқон бозорига Миллий банк томонидан, «Чилонзор» бозорига «Микрокредитбанк» ҳамда «Ўрикзор» савдо мажмуасига «Ипак йўли» банки томонидан банкоматлар ўрнатилди.
Мазкур банкоматларнинг барчасида битта пластик картадан 100 минг сўмгача бўлган пул маблағини нақдлаштириб олиш мумкин, пулни ечиб олиш жараёни 1,5—2 дақиқа давом этади. Банкоматлар 9:00 дан 18:00 гача ишлаши айтилмоқда.
Аввалроқ Олой бозоридаги банкоматдаги пуллар бозорнинг иш вақти якунига етишидан аввал тугаб қолгани, кейин яна пул билан тўлдирилгани ҳақида хабар берилган эди.
Изоҳ (0)