АҚШ ҳарбий-денгиз кучлари штаби бошлиғи адмирал Жон Ричардсон барча флотларга бутун дунё бўйлаб ҳарбий-денгиз операцияларини ўтказишни тўхтатишга буйруқ берди. Бу ҳақда «ТАСС» маълум қилди.
21 август, душанба куни Сингапур яқинидаги Малаккa бўғозида John S. McCain ракета эсминецининг Аlnic МC танкери билан тўқнашувидан сўнг шундай қарор қабул қилинди. Ҳодиса оқибатида 10 нафар денгизчи бедарак йўқолди, 5 киши жароҳат олди.
«Хабарингиз бор, бу ўтган 3 ой мобайнидаги иккинчи тўқнашув ва Тинч океанида юз берган туркум ҳодисалардан охиргиси. Мазкур ҳолат қатъий ҳаракатларни талаб этади. Мен бутун дунёдаги барча флотларимизда операцион танаффус жорий этишга буйруқ бердим», — дейилади адмиралнинг Facebook’даги саҳифасида жойлаштирилган видеомурожаатида.
Эслатиб ўтамиз, 17 июнда Идзу ярим ороли жанубидаги Иродзаки бурнидан 20 километр узоқда Fitzgerald эсминеци ҳам ACX Crystal контейнер ташувчиси билан тўқнашган ва 7 нафар америкалик денгизчи ҳалок бўлганди.
Изоҳ (0)