Ўзбекистон ҳамда Қозоғистон Мудофаа вазирликлари ўзаро тезкор ва жанговар тадбирларини, жумладан, ҳарбий таълим соҳасини ўз ичига олувчи ҳарбий ҳамкорлик режасини имзолади, деб хабар берди «Газета.uz».
Қозоғистон Мудофаа вазирлиги сайтининг маълум қилишича, ушбу ҳужжат икки мамлакат ҳарбий идоралари ўртасидаги икки томонлама муносабатлар тарихида биринчи бор қабул қилинган. Ҳужжат ўтган ҳафта Қозоғистон мудофаа идораси генерал-полковниги Сакен Жасузақовнинг Ўзбекистонга расмий ташрифи чоғида имзоланган. Сакен Жасузақов Тошкентда Ўзбекистон Президенти Шавкат Мирзиёев ва Ўзбекистон Мудофаа вазири генерал-полковник Қобил Бердиев билан учрашган эди.
Шунингдек, Қозоғистон Мудофаа вазири Ўзбекистон Қуролли Кучларининг Қўқондаги ҳарбий қисмларидан бирига ташриф буюрди. Бундан ташқари у Самарқандга бориб Ўзбекистоннинг биринчи Президенти Ислом Каримов қабрига гул қўйиб, ҳурмат бажо келтирди.
Изоҳ (0)