Матбуот ва ахборот агентлигида «Қоғоз саноати: бугуни ва истиқболи» мавзусида илмий-амалий семинар ўтказилди

Ўзбекистон Матбуот ва ахборот агентлигида «Қоғоз саноати: бугуни ва истиқболи» мавзусида Республика илмий-амалий семинари бўлиб ўтди. Бу ҳақда «Дарё»га агентлик мутасаддилари маълум қилди.

Ўзбекистондаги нашриётлар томонидан йилига 3 минг номдан зиёд, умумий адади 60 миллион нусхадан ортиқ китоб маҳсулотлари нашр этилмоқда. Табиийки, газета-журнал, ахборотнома-бюллетен, китобларни чоп этиш учун мамлакатда қоғозга бўлган талаб катта.

Ўзбекистон Президенти Шавкат Мирзиёевнинг жорий йил 3 августдаги ижодкор зиёлилари вакиллари билан бўлиб ўтган учрашувида республикада қоғоз ишлаб чиқаришни ривожлантириш, бу борада матбаа корхоналарининг импорт ўрнини босадиган юқори сифатли қоғоз хом ашёси билан таъминлаш масаласи ўртага ташланди.

Ҳозирги кунда республикадаги қоғоз хом ашёсига бир йиллик эҳтиёж жами 350 минг тоннага етади, ундан 120 минг тоннадан зиёдини офсет ва газета қоғози ташкил этади. Китоб, журнал, газета, ўқув дафтари, офис қоғози ва бошқа оқ қоғоз ва босма маҳсулотлари айнан офсет ва газета қоғозидан ишлаб чиқарилади. Ўзбекистондаги матбаа корхоналарида асосан чет эл қоғоз маҳсулотлари ишлатилади.

Мамлакатда мавжуд қоғоз ишлаб чиқарувчи корхоналарда бугунги кунда коробкалар учун картон, крафт қоғози, қоғоз қопи, конус, қадоқлаш қоғози, хўжалик қоғози, салфетка ва бошқа маҳсулотлар ишлаб чиқарилмоқда.Республикада сифатли қоғоз ва целлюлоза ишлаб чиқаришни ташкил қилиш борасида амалий ишлар олиб борилмоқда. Бунда чет эл тажрибаси ўрганилиб, замонавий ускуналар ўрнатиш масалалари кўриб чиқилмоқда.

Анжуманда целлюлоза ва ёғочсозлик соҳасидаги олимлар, қоғоз ишлаб чиқарувчи корхоналари раҳбарлари ва мутахассислари, истеъмолчилар — матбаа корхоналари раҳбарлари ва технологлари иштирок этди. Ўзбекистонда қоғоз ишлаб чиқаришнинг ҳолати ва истиқболлари, матбаа корхоналари ва истеъмол бозорини офсет қоғози билан таъминлаш масалалари, маҳаллий целлюлоза ишлаб чиқариш масалалари муҳокама қилинди.

Ўзбекистонда сифатли қоғоз ишлаб чиқаришни йўлга қўйиш борасидаги ишлар бўйича фикр алмашилиб, мавжуд муаммолар ечимини топиш юзасидан аниқ таклифлар билдирилди.