O‘zbekiston Matbuot va axborot agentligida “Qog‘oz sanoati: buguni va istiqboli” mavzusida Respublika ilmiy-amaliy seminari bo‘lib o‘tdi. Bu haqda “Daryo”ga agentlik mutasaddilari ma’lum qildi.
O‘zbekistondagi nashriyotlar tomonidan yiliga 3 ming nomdan ziyod, umumiy adadi 60 million nusxadan ortiq kitob mahsulotlari nashr etilmoqda. Tabiiyki, gazeta-jurnal, axborotnoma-byulleten, kitoblarni chop etish uchun mamlakatda qog‘ozga bo‘lgan talab katta.
O‘zbekiston Prezidenti Shavkat Mirziyoyevning joriy yil 3-avgustdagi ijodkor ziyolilari vakillari bilan bo‘lib o‘tgan uchrashuvida respublikada qog‘oz ishlab chiqarishni rivojlantirish, bu borada matbaa korxonalarining import o‘rnini bosadigan yuqori sifatli qog‘oz xom ashyosi bilan ta’minlash masalasi o‘rtaga tashlandi.
Hozirgi kunda respublikadagi qog‘oz xom ashyosiga bir yillik ehtiyoj jami 350 ming tonnaga yetadi, undan 120 ming tonnadan ziyodini ofset va gazeta qog‘ozi tashkil etadi. Kitob, jurnal, gazeta, o‘quv daftari, ofis qog‘ozi va boshqa oq qog‘oz va bosma mahsulotlari aynan ofset va gazeta qog‘ozidan ishlab chiqariladi. O‘zbekistondagi matbaa korxonalarida asosan chet el qog‘oz mahsulotlari ishlatiladi.
Mamlakatda mavjud qog‘oz ishlab chiqaruvchi korxonalarda bugungi kunda korobkalar uchun karton, kraft qog‘ozi, qog‘oz qopi, konus, qadoqlash qog‘ozi, xo‘jalik qog‘ozi, salfetka va boshqa mahsulotlar ishlab chiqarilmoqda.Respublikada sifatli qog‘oz va sellyuloza ishlab chiqarishni tashkil qilish borasida amaliy ishlar olib borilmoqda. Bunda chet el tajribasi o‘rganilib, zamonaviy uskunalar o‘rnatish masalalari ko‘rib chiqilmoqda.
Anjumanda sellyuloza va yog‘ochsozlik sohasidagi olimlar, qog‘oz ishlab chiqaruvchi korxonalari rahbarlari va mutaxassislari, iste’molchilar — matbaa korxonalari rahbarlari va texnologlari ishtirok etdi. O‘zbekistonda qog‘oz ishlab chiqarishning holati va istiqbollari, matbaa korxonalari va iste’mol bozorini ofset qog‘ozi bilan ta’minlash masalalari, mahalliy sellyuloza ishlab chiqarish masalalari muhokama qilindi.
O‘zbekistonda sifatli qog‘oz ishlab chiqarishni yo‘lga qo‘yish borasidagi ishlar bo‘yicha fikr almashilib, mavjud muammolar yechimini topish yuzasidan aniq takliflar bildirildi.
Izoh (0)