Эмомали Раҳмон Тожикистон Миллий кутубхонаси директорини ўғлининг дабдабали тўйи учун ишдан бўшатди

Тожикистон президенти Эмомали Раҳмон 15 август куни Миллий кутубхона директори Сайфиддин Назарзодани ўғлининг дабдабали тўйи учун ишдан бўшатди. Бу ҳақда «Asia-Plus»  хабар бермоқда.

Июль ойида Тожикистон Фанлар академияси мухбир аъзолигига сайланган Назарзоданинг лавозимидан кетишига «Анъаналар, тантаналар ва маросимлар» ҳақидаги қонун меъёрларини бузгани сабаб бўлди. «Тожикистон» давлат телеканалининг «Ахбор» дастурига кўра, Миллий кутубхона директори 30 июль куни ўғли Фирдавсни Душанбедаги «Шоира Люкс» ресторанида уйлантиради. Тўйда 300 нафардан ортиқ меҳмон иштирок этади, қонунга биноан эса уларнинг сони 150 кишидан ошмаслиги лозим.

Сайфиддин Назарзода телеканалда бу ҳолат ҳақидаги репортаж эфирга узатилганидан сўнг қонунни бузмаганлиги, унга нисбатан илгари сурилаётган айбловлар эса душманларининг иши эканлигини билдирди. 60 ёшли мансабдор 2014 йил декабрида Миллий кутубхона директори этиб тайинлаганди.

Эмомали Раҳмон 11 июль куни «Анъаналар, тантаналар ва маросимлар» ҳақидаги қонуннинг 10 йилллигига бағишланган йиғилишда Адлия вазирлиги ва бошқа тегишли идораларга қонун талабларига бўйсунмаган давлат хизматчилари, ҳуқуқ-тартибот ва ҳарбий соҳа ходимларини эгаллаган лавозимларидан озод қилиш, диний арбоблар, тадбиркорлар ва бошқа шахслар учун эса жарималар миқдорини бир неча карра кўпайтириш бўйича таклифлар беришни топширганди.