Аргентинада Нидерландия қироличасининг отаси вафот этди

Нидерландия қироличаси Максиманинг отаси Хорхе Соррегиета 89 ёшида Буэнос-Айресда вафот этди, деб ёзади «ТАСС» у даволанган тиббий муассасага таяниб.

Баёнотга кўра, унинг ўлимига ўпка инфекциясини келтириб чиқарган лимфома сабабчи бўлган.

Баъзи ОАВлар хабарига кўра, қиролича Максима отасининг саломатлиги ёмонлашгани туфайли, 5 август, шанба куни Буэнос-Айресга етиб келган, 8 август, сешанба куни ҳалиям шаҳарда бўлган. Аммо бошқа ОАВлар у 6 август, якшанба куни Нидерландияга қайтиб кетганини айтмоқда.

Аргентинада диктатура ҳукм сурган йилларда Соррегиета қишлоқ хўжалиги, чорвачилик ва балиқчилик вазири ўринбосари (1979—1981 йиллар) бўлган. Демократия қайта тиклангач, у тадбиркорлик фаолияти билан шуғулланган.

Нидерландия қироличаси Максима 1971 йилда Буэнос-Айресда асли италиялик ва испанияликлар оиласида туғилган. Иқтисодиёт соҳасида ўқиб, АҚШ ва Европадаги йирик банкларда ишлаган. Ўша пайтда Нидерландия шаҳзодаси бўлган Виллем-Александр билан у 1999 йилда Испаниядаги ёпиқ зиёфатда танишган. 2002 йилда улар турмуш қурган.