Шавкат Тўлаганов Ўзбекистон Президенти давлат маслаҳатчисининг ижтимоий-иқтисодий сиёсатни мувофиқлаштириш ишлари бўйича биринчи ўринбосари этиб тайинланди. Бу ҳақда «Газета.uz» хабар бермоқда.
Давлат раҳбарининг 7 августдаги фармонида айтилишича, унга кичик саноат зоналари ва эркин иқтисодий зоналари фаолиятини мувофиқлаштириш вазифаси юклатилган.
Шавкат Тўлаганов 1964 йилда туғилган, Тошкент политехника институти ва Тошкент давлат иқтисодиёт университетини битирган. Ушбу тайинловга қадар у 2008 йилдан буён ташқи савдо вазири ўринбосари лавозимида фаолият юритган (вазирлик қайта ташкил этилишига қадар — ташқи иқтисодий алоқалар, инвестиция ва савдо вазири ўринбосари).
2005—2008 йилларда иқтисодиёт вазирининг Иқтисод ва инвестиция дастурларини модернизациялаш масалалари бўйича ўринбосари, 1995—2005 йилларда «Ўзавтосаноат» АК бўлим бошлиғи, бошқарма бошлиғи, бошқарув раиси ўринбосари лавозимларини эгаллаган.
Изоҳ (0)