2 август куни Ўзбекистон Президенти Шавкат Мирзиёев раислигида 11 йиллик ўрта таълим тизимини жорий этиш масалаларига бағишланган видеоселектор йиғилиши бўлиб ўтди.
Аввалроқ жойларда ота-оналар ва ўқувчилар ҳамда кенг жамоатчиликнинг 2017—2018-ўқув йилидан бошлаб 9-синф битирувчилари умумтаълим мактабларининг 10-синфларида, академик лицей ёки касб-ҳунар коллежларида ўқишни давом эттиришига оид фикрлари ўрганилган эди.
Бу жараёнда, ЎзАнинг ёзишича, умумтаълим мактабларининг 466 минг нафар 9-синф битирувчисидан 352 минг нафари 10-синфда, 114 минг нафари академик лицей ва касб-ҳунар коллежларида ўқишни давом эттириш ниятида экани аниқланган.
Ота-оналар томонидан 12 йиллик мажбурий таълим муддати ортиқча экани тўғрисида кўплаб фикрларни инобатга олиб, биз жуда кўп муҳокама қилдик. Жаҳонда 11 йиллик ўрта таълим етарли ҳисобланса-да, биз ёшларимизни бир йил ортиқча ўқитганмиз. Бунинг оқибатида ёшларимиз бир йиллик умрини бекорга йўқотиб, мустақил ҳаётга қадам қўйишда кечикяпти.Бу бизга нима учун керак? Энг аввало, ёшларимизнинг хулқ-атвори, тарбияси ва сифатли билим олиши, мамлакатимиз ва халқимизнинг эртанги куни, тараққиётимизнинг таянчи бўлиб хизмат қилади. Шу билан бирга, ўсмирлар орасида жиноятчиликнинг олди олиниб, энг муҳими, қанчадан-қанча ёшларимизнинг қалтис йўллардан қайтариб, жамиятимизнинг муносиб давомчилари бўлишига ёрдам беради.
Шавкат Мирзиёев, Ўзбекистон Президенти
Маълумот учун, йиғилишда тегишли ташкилотларга шу йил 20 августга қадар ҳар бир ўқувчининг аниқ мактаб, лицей ёки касб-ҳунар коллежида ўқишни давом эттиришини таъминлаш вазифаси юклатилган.
Изоҳ (0)