Австралияда таркибига хавфсизлик масалалари билан шуғулланувчи муассаса ва хизматлар кирадиган ички ишлар вазирлиги ташкил этилади. Бу ҳақда мамлакат бош вазири Малколм Тёрнбулл маълум қилди, дея хабар беради «ТАСС».
«Ўзгаришлар босқичма-босқич амалга оширилади. Янги вазирликни шакллантириш келгуси йилнинг биринчи ярмида якунланиши лозим», — таъкидлади бош вазир.
Маҳаллий матбуот хавфсизлик супервазирлиги деб номлашга улгурган Австралия ИИВ таркибига миграция ва чегара назорати хизматлари, федерал полиция, Австралия хавфсизлик ва разведка хизмати (ASIO), Миллий молиявий разведка хизмати (AUSTRAC) ва бошқа қатор ҳуқуқ-тартибот идоралари киради. Мазкур идоралар ўз тизимларини сақлаб қолади, вазир эса асосан уларнинг фаолиятини мувофиқлаштирувчи вазифасини бажаради.
Янги вазирликни бошқариш иммиграция ва чегараларни қўриқлаш вазири Питер Даттонга топширилиши кутилмоқда.
Изоҳ (0)