Американинг Billboard нашри 2016 йилнинг энг кўп пул ишлаб топган мусиқачилари рейтингини эълон қилди.
Billboard’s Top 50 Money Makers of 2016 рейтингида америкалик қўшиқчи Бейонсе 62,1 миллион долларлик даромади билан етакчилик қилди. Ушбу суммани хонанда Lemonade альбоми ва дунё бўйлаб гастроль сафари орқали ишлаб топди.
20 миллион долларлик фарқ билан иккинчи ўринни Американинг хард-рок гуруҳи — Guns N’ Roses банд этди. Гуруҳ аъзолари 42,3 миллион доллар орттирди, бу 2016 йилнинг апрелида бошланиб, ҳозиргача давом этаётган гастроль сафарлари шарофати билан бўлди.
Юқори учликка америкалик рок ва фолк мусиқачи Брюс Спрингстин якун ясади. Қўшиқчи 2015 йил охирида юбилей бокс сетини чиқариб, турнега отланган эди, натижада эса у 42,2 миллион доллар ишлаб олди.
Ўнталикка, шунингдек, канадалик рэпер Дрейк, британиялик хонанда Адель, Англиянинг Coldplay поп-рок гуруҳи, канадалик Жастин Бибер, америкалик кантри мусиқачилар Люк Брайан ва Кенни Чесни, америкалик рэпер Канье Уэст ҳам кирди.
Изоҳ (0)