Таиланд мезбонлик қилган бокс бўйича Осиё чемпионатининг 91 килограммгача бўлган вазн тоифасида ўзбекистонлик Профсор Роримша олтин медални қўлга киритган бўлиб, бу якунда мамлакат делегациясининг умумжамоа ҳисобида 1-ўринни қўлга киритишига ёрдам берганди.
Миллий олимпия қўмитаси матбуот хизмати мазкур воқеа ҳақида ёзар экан, қуйида фикрларни билдирди:
«Ўзбекистон терма жамоаси шарафини ҳимоя қилган Профсор Роримша хусусида ижтимоий тармоқларда турли фикрлар билдирилмоқда. Гўёки, Рио ўйинларида Озарбайжон терма жамоаси шарафини ҳимоя қилган кубалик Лоренцо Сотомаёр каби Роримша ҳам Ўзбекистон терма жамоаси таркибига легионер сифатида жалб этилган».
Шундан сўнг МОҚ масалага ойдинлик киритган. Биринчидан, спортнинг бокс турида Ўзбекистон ҳеч қандай легионер хизматига муҳтож эмас, деб ёзади матбуот хизмати. Ўзбекистон шундоқ ҳам жаҳонда етакчилардан бири. Рио—2016 Олимпиадасида ҳам, кейинроқ Тошкентдаги Осиё чемпионатида ҳам Ўзбекистон бокс терма жамоаси барчадан устун бўла олди.
Профсор Роримша асли бухоролик бўлган Гуландом Раҳматова ҳамда АҚШ фуқароси Рорумеша Ибрагим Суведининг фарзанди. «Оламспорт» нашрига берган интервьюсида Роримша 1999 йил Дубайда туғилганини, 4 ёшида Ўзбекистонга келганини айтган. У айни пайтда Бухоро олимпия захиралари коллежида таҳсил олади.
Боксда унга Улуғбек Қиличев устозлик қилди. Роримша 2015 йил Тошкентдаги ўсмирлар ўртасидаги Осиё чемпионатида олтин, Санкт-Петербургдаги Жаҳон чемпионатида эса бронза медалига эга чиқди. Орадан икки йил ўтиб ёшлар ўртасидаги қитъа чемпионатида чемпион бўлди.
«Оламспорт»даги интервьюсида Роримша ўзбек тилида бемалол сўзлашиши ҳақида айтган. «Кичик пайтимда уйда онам инглизча гапирсалар, мен ўзбек тилида жавоб берардим. Ўртоқларим билан ҳам ўзбекча гаплашардим», — дейди боксчи.
Изоҳ (0)