«Пахтакор» 6 футболчи билан 2019 йил якунигача шартнома тузди. Клубда энди рақобат кучли

Тошкентнинг «Пахтакор» клуби айтиб ўтилганидек, 11 июль куни жамоанинг 5 нафар янги футболчисини жамоатчиликка таништирди. Уларнинг икки нафари хориждан таклиф этилган легионерлар бўлса, қолган учтаси ўзбекистонлик футболчилардир.

Матбуот анжуманида иштирок этган «Championat.asia» нашри клубга янги қўшилган футболчиларнинг шартнома тузиб бўлгач айтган фикрларини ёзиб олди. Қуйида улар билан танишиш мумкин.

Олдинга ўтиб шуни айтиш керакки, янги футболчиларнинг барчаси «Пахтакор» билан 2,5 йиллик шартнома имзолади. Аввалроқ черногориялик ҳимоячи Марко Симич ҳам клуб билан 2019 йил сўнгига қадар қолишга рози бўлганди.

Элдор Суюнов

Ўзбекистон миллий терма жамоаси дарвозабони «Пахтакор»да худди «Насаф»да бўлгани учун 25-рақамда ҳаракат қилади.

«Пахтакор»га ўтишимга асосий омил — жамоада руй бераётган ўзгаришлар, бу Ўзбекистон учун янгилик. Менга «Пахтакор»нинг янги лойиҳаси ёқди, айнан шу нарса мени бу жамоага келишимга сабаб бўлди. Рақобатдан эса қўрқмайман, бу биз учун фойдали.

Элдор Суюнов, «Пахтакор» аъзоси

Шерзод Аъзамов

«Насаф» сардори сифатида футбол мухлисларига таниш бўлган футболчи янги клубида 70-рақамда тўп суради.

«Насаф»дан кетиш қийин бўлди. Энди эса қарор қабул қилинган, ортга йўл йўқ. «Пахтакор»га катта совринларни қўлга киритиш учун келдим. Бошқа сабаб йўқ.

Шерзод Аъзамов, «Пахтакор» аъзоси

Гиди Канюк

Исроиллик футболчи янги клубида 52-рақамда тўп суради. Шота Арвеладзе унга ярим ҳимояда суянишни ният қилган.

«Пахтакор»нинг кучли эканини ва шонли тарихи борлигини биламиз. Энди унинг ўша тарихни қайтариш йўлида кўмаклашгани келдик.

Гиди Канюк, «Пахтакор» аъзоси

Тиагу Безерра

Фаолиятининг асосий қисмини Туркия чемпионатида ўтказган бразилиялик ҳужумчи 77-рақамни танлаб олди.

Туркияда «Пахтакор»ни жуда яхши билишади. Арвеладзенинг жамоа бошқарувига ўтгани ажойиб иш бўлди. Унинг таклифига кўра «Пахтакор»ни танладим. Ўйлайманки, жамоа билан биргаликда кўплаб ғалабаларни қўлга киритамиз. Бу йилги мақсад клубни Чемпионлар лигасига қайтариш. Келаси йилдан бошлаб барча мусобақаларда ғолибликни кўзлаймиз.

Тиагу Безерра, «Пахтакор» аъзоси

Забиҳилло Ўринбоев

«Бунёдкор»да Сергей Лушчан қадрига етмаган футболчи, мавсумнинг ярмини «Олмалиқ» сафида ўтказганди. Энди эса «Пахтакор» либосида 71-рақамда тўп суради. Кичик мундиалларнинг бир эмас, учтасини кўрган ҳужумчи ярим йил аввал ҳам Тошкентнинг бошқа бир гранд клубида эди. Энди унга рақобатчи бўлган бошқасида пайдо бўлди.

«Пахтакор»дан чорлов бўлди. Бу таклиф менга ёққани учун уни танладим. Рақобатнинг кучли экани яхши, бу бизнинг фойдамизга ишлайди.

Забиҳилло Ўринбоев, «Пахтакор» аъзоси